Birinshi jekpe-jekte komanda kapıtany Oljas Sáttibaev (52 keli) óz qarsylasy Vıacheslav Tashkaraevty birden soqqynyń astyna alyp, eki birdeı raýndta aıqyn basymdyqpen óner kórsetti. Al úshinshi raýndta Tashkaraevtyń qabaǵy jarylyp qaldy. Dáriger oǵan ary qaraı judyryqtasýǵa ruqsat bermedi. Sóıtip, Sáttibaev upaı sanymen jeńiske jetti.
60 keli salmaq dárejesi boıynsha ótken ekinshi jekpe-jek te tartysty ótti. Astana arlany Zákir Safıýllın bashqurt boksshysy Artýr Subxanqulovty nokaýtqa túsirýge tyrysty. Betin qan qyldy. Nokaýtqa túsire almasa da, aıqyn basymdyqpen jeńdi.
Al 69 keli salmaǵynda Aslanbek Shymbergenovtyń qarsylasy Shaxabas Maxmudov óte shıraq bolyp shyqty. Soǵan qaramastan, Shymbergenov sheberligi arqasynda jeńiske jetti.
Tórtinshi jekpe-jekte Arman Rysbekke (81 keli) ońaı bolǵan joq. Oǵan qarsy Álem chempıonatynyń júldegeri Pavel Sılıagın shyqty. Qoly uzyn ári jyldam Sılıagın óz qarsylasyn birden eseńgiretemin dep oılady. Alaıda Arman Rysbek baıaý qımyldasa da, óz soqqylaryn daryta bildi. Tipti, bir soqqysy qatty tıgeni sonsha, referı jekpe-jekti toqtatyp, nokdaýnnyń sekýndtaryn sanaýǵa májbúr boldy. Bes raýndtyń nátıjesi boıynsha qazaqstandyq boksshy jeńimpaz atandy.
Besinshi jekpe-jekte aýyr salmaqtaǵy boksshylar judyryqtasty. Oljas Boqaev «Astana arlandary» sapyndaǵy debıýttik kezdesýin ótkizdi. Onyń qarsylasy tájirıbeli Magomed Omarov boldy. Bul jekpe-jekte Boqaev baryn salyp, ózinen 8 santımetrge uzyn qarsylasty jeńýge kúsh saldy. Namysqa tyrysyp, shabýyldy ózi údetip, birinshi nómirmen de bokstasty. Alaıda óz maqsatyna jete almady. Reseılik boksshynyń joly boldy. Osylaısha, bes jekpe-jektiń qorytyndysy boıynsha «Astana arlandary» 4:1 esebimen jeńiske jetip, pleı-off saıystaryna joldama aldy. «Astana arlandarynyń» búgingi boks keshi Taraz qalasynda ótti.
