Qaladaǵy «Medıker pedıatrııa» jekemenshik klınkasymen «Jedel medısınalyq járdem» stansalarynyń jumystarymen tanysqan mınıstr úshinshi nysanda pasıenttermen de áńgimelesip, odan dárigerlermen kezdesip, jýrnalıster tarapynan qoıylǵan saýaldarǵa da jaýap berdi.
Emdelýshilerdiń biri mınıstrdiń aldynda emhanalarda salalyq mamanǵa baryp qaralýdyń asa qıyn ekendigin alǵa tartty. Oǵan jaýap bergen bas dáriger Altynshash Tabyldına: «Pasıenttiń aıtqan sózi ras, salalyq mamandarǵa ýchaskelik dáriger jazyp alady. Bul másele bizdiń kóptegen pasıentterge unamaıdy, biz túsindirýge tyrysqanymyzben, olar ony túsingileri kelmeıdi. Qolda EKG bolmasa, kardıolog mamanǵa barýdyń qajeti qansha? Qajeti bolmasa, onsyz da úlken salmaq salynyp otyrǵan salalyq mamanǵa pasıentterdi jiberý qısynsyz», dedi. Bas dárigerdiń jaýabyn estip, máselege mán bergen mınıstr, salalyq mamandar tapshylyǵynan osyndaı máseleler týyndap otyrǵanyna toqtaldy: «Árıne, bul – óte úlken másele. Búgingi bizdiń basty maqsatymyz – jekemenshik medısınalyq ortalyqtar men tegin medısınalyq qyzmetter júıesin medısınalyq saqtandyrý júıesine tartý. Bul adamdardyń salalyq mamandy tańdap, ony úsh aı kútpesten eminen ótýine múmkindik beredi. Búginde memlekettik medısınalyq mekemelerde kezek kóp, mamandar tapshy, tarıfter tómen, sodan dárigerdiń de jalaqysy az. Jekemenshik sektor bolsa óte qarqyndy damyp jatyr, naryqtyq baǵalar tartymdy bolǵan soń dárigerler sol jaqqa ketýde. Mysaly, biz bir dárigerdiń konsýltasııasyna 1 myń teńge tóleımiz, al jekemenshik klınıkada ol 5-6 myń teńge turady. Árıne, sondyqtan dárigerlerdiń barlyǵy jekemenshik klınıkada otyrǵysy keledi. Bizge osy eki júıeni biriktirý kerek», dep atap ótti E.Birtanov.
Kezdesýde mınıstr bıylǵy jyldyń sońyna deıin elordadaǵy emhanalardyń tolyǵymen elektrondy formatqa kóshetinin aıtty. Qaǵazbastylyqtan múldem bas tartqymyz keledi, sondyqtan da ony bir-eki jerde emes, respýblıka boıynsha bir ýaqytta júzege asyrý mańyzdy. «Astana qalasynyń ákimi Áset Isekeshevpen kelistik, olar óz emhanalaryn daıyndap qoıady. Osylaısha, elordany 1 qańtarǵa deıin tolyǵymen elektrondy formatqa kóshirýdi kózdep otyrmyz. Sebebi, medısına qyzmetkerleriniń ne jazýy kerek, ne kompıýtermen basýy kerek. Bul bir jumysty eki ret qaıtalap istemeý úshin qajet», dep atap kórsetti E.Birtanov.
Kezdesýde astanalyq beldi medısınalyq klınıkalardyń menedjerleri ózderin tolǵandyrǵan birqatar máselelerdi mınıstrdiń qaperine salyp, jańa júıeniń enýine baılanysty keıbir medısınalyq kómek kórsetýdiń tarıfterine qatysty saýaldar qoıdy.
Anar TО́LEÝHANQYZY, «Egemen Qazaqstan»
