R.Vasılenko birinshi kezekte 2015 jyldyń 27 tamyzynda Astanada Qazaqstan men Atom energetıkasy jónindegi halyqaralyq agenttigi (MAGATE) arasynda Tómen baıytylǵan ýran bankin qurý týraly kelisimge qol qoıylǵanyn atap ótti. Onyń aıtýynsha, Qazaqstan bul kelisimdi ótken jyly ratıfıkasııalaǵan. Qazirgi tańda bank ǵımaratynyń qurylysy júrgizilýde. Ol bıyl paıdalanýǵa beriledi dep kútilýde.
Sondaı-aq, Syrtqy ister mınıstriniń orynbasary banktiń ashylý saltanatynyń 29 tamyzǵa belgilenýiniń sebebin de túsindire ketti. «Tómen baıytylǵan ýran bankin resmı túrde 29 tamyzda ashýdyń ózindik mańyzdy sebebi bar. Naqtylaı aıtqanda, 1949 jyldyń 29 tamyzynda Semeı synaq polıgonynda Keńes Odaǵy alǵash ret ıadrolyq qarýyn synaǵan, sondaı-aq, 1991 jyldyń 29 tamyzynda Qazaqstan Prezıdenti Nursultan Nazarbaevtyń tarıhı Jarlyǵymen atalǵan polıgon jabylǵan. Bul kún BUU tarapynan Qazaqstan Prezıdentiniń bastamasy negizinde Iаdrolyq synaqtarǵa qarsy halyqaralyq is-qımyl kúni dep jarııalandy», – dedi ol.
Sonymen qatar, R.Vasılenko atalǵan banktiń ashylý rásimine Qazaqstan Prezıdenti Nursultan Nazarbaev pen Atom energetıkasy jónindegi halyqaralyq agenttiktiń bas dırektory Iýkııa Amanonyń qatysatynyna úmittenetinin jetkizdi.
О́z kezeginde Iýkııa Amano atalǵan iske baılanysy barlyq úderister kestege saı júrip jatqanyn, bank resmı túrde ashylǵannan keıin agenttik odan tómen baıytylǵan ýran otynyn satyp ala bastaıtynyn aıtty.
