Elbasy Nursultan Nazarbaev bıylǵy Joldaýynda «aǵylshyn tili – jańa tehnologııa, jańa ındýstrııa, jańa ekonomıka tili. Aǵylshyn tilin meńgermeı, Qazaqstan jalpyulttyq progreske jete almaıdy», dep dúnıe júzine qulashyn keń jaıǵan tildi úırenýdiń mańyzdylyǵyn aıryqsha atap ótken edi.
– Biz eń áýeli oqýshylardyń ata-analary arasynda saýalnama uıymdastyryp, «eger biz mektepte aǵylshyn tilinen tegin kýrs ashatyn bolsaq, kelesizder me?» degen suraq qoıdyq. Ata-analardyń 90 paıyzy kelemiz dep jaýap berdi. Ýaqyt jaǵyn da saýalnama arqyly anyqtadyq. Sóıtip, keshki saǵat 6 men 7-niń arasynda aǵylshyn tilinen tegin kýrs ótkizemiz dep kelistik. Mine, bir aıdaı ýaqyt bolyp qaldy. Qazir eki tobymyz bar. Bizdiń bul kýrsty ashýdaǵy maqsatymyz – bala mektepte úırengen nársesin úıde de jalǵastyrsa, ári qaraı tereńdetse, damytsa deımiz. О́kinishke qaraı, ata-analardyń 56 paıyzy aǵylshyn tilinen balalaryna kómektese almaıdy eken. О́ıtkeni, aǵylshyn tilin bilmeıdi. Sondyqtan oqýshynyń áke-sheshesiniń til úırengeninen utpasaq, utylmaıtynymyz anyq, – deıdi mektep-lıseıdiń dırektory Selman Shımshek.
Onyń aıtýynsha, bul bastama oqýshylardyń til bilý deńgeıin kóterip qana qoımaıdy, olardyń ata-anasymen aradaǵy qarym-qatynasty kúsheıtýge yqpal etedi, bir-birine jaqyndastyra túsedi. О́ıtkeni, qazirgi qoǵamda ata-ana men oqýshy arasyndaǵy baılanystyń álsirep bara jatqany belgili. Keıbir ata-analardyń balasynan góri ǵalamtor men uıaly telefonǵa kóbirek kóńil bóletini jaıynda da az aıtylyp júrgen joq.
Bul mekteptiń oqýshylaryna da, olardyń ata-analaryna da aǵylshyn tilin úıretip júrgen muǵalimniń aty – Rovena Gabýt. Fılıppın elinen kelipti.
– «Sen ne qazaq tilin, ne orys tilin durys bilmeısiń. Ata-analarǵa aǵylshyn tilin qalaı úıretip jatyrsyń?» dep suraıdy menen bári. Tańǵalady. Biraq úıretip jatyrmyn. Tájirıbe júzinde úıretip jatyrmyn. Eń bastysy, oqýshylaryma burynǵydan góri bir taban jaqyndaı túskendeı boldym. О́ıtkeni, olardyń ata-anasyn tanydym. Shákirtterime úıde aǵylshyn tilin úıretetin, sóılesetin adam tabylǵanyna, bergen bilimimniń dalaǵa ketpeıtinine qýanyp otyrmyn. Ata-analar da jaqsy qabyldap jatyr. Aqyryndap sóılem quraýdy úırenip keledi, – deıdi ol.
– Jasyratyn nesi bar, balalarymyzǵa basqa pánderden kómektesip júrgenimizben aǵylshyn tiline kelgende at-tonymyzdy ala qashatyn edik. Endi mine, ózimizdiń de úırenip jatqan jaıymyz bar. Balammen aǵylshynsha sóıleskim keledi. Sabaqtyń ýaqyty da qolaıly. Keshke jaqyn balańdy mektepten alýǵa kelgende bir saǵatyńdy aǵylshynsha úırenýge arnaǵannyń artyǵy joq dep oılaımyn, – deıdi tegin kýrsqa qatysyp júrgen ata-ananyń biri Gúlmıra Sháriphanova.
Mektepte jańa oqý jylynan bastap oqýshylardyń oılaý, tez sheshim qabyldaý, sabyr saqtaý sekildi qabiletterin jetildirý maqsatynda «Intellektým» atty eki kabınet ashylypty. Aptasyna bir márte júrgiziletin pán oqý baǵdarlamasyna da engizilgen. Shyǵys Qazaqstan mektepterinde alǵash ret qolǵa alynyp otyrǵan bul jobaǵa oblystyq bilim basqarmasy qoldaý bildirip, О́skemendegi «Úmit» balalar úıi men jýyqta ǵana múmkindigi shekteýli balalarǵa arnalyp ashylǵan «Aqnıet» ınternat-mektebinde de osyndaı eki kabınet ashty. Bul pándi ázirge 1-6 synyp oqýshylary oqyp jatyr. Keleshekte joǵary synyp oqýshylaryn oqytý da josparlanyp otyr.
Azamat QASYM, «Egemen Qazaqstan»
О́SKEMEN
