Qyzyljar óńirinde kommýnaldyq tólemder boıynsha qaryzǵa belsheden batqan turǵyndar jyrtylyp-aıyrylady. Qazir olardyń bereshegi 400 mıllıon teńgeni qurap, sot organdaryna 452 talap-aryz joldanǵan.
«Sevkazenergosbyt» JShS-niń basqarma basshysy Rústem Ramazanovtyń aıtýynsha, bereshek tólemder úshin jyl basynan beri eki myńǵa jýyq páter elektr qýatynan aǵytylǵan. Biraq, dúnıe-múlkin tárkileý, shet elge shyǵýǵa tyıym salý sekildi qoldanylǵan sharalarǵa qaramastan, kommýnaldyq qaryzdardyń kemıtin túri baıqalmaıdy. Mindetti tólemnen jaltaryp, neshe túrli qýlyqtarǵa baratyndar birneshe márte áshkerelengen. Olardyń arasynda elektr qýatyn zańsyz qosyp alǵandar jıi kezdesetin kórinedi. Petropavl qalasynyń bir turǵyny on jyldan beri esep aıyryspaı kelgen. 7 adamnyń qaryzy jarty mıllıon teńgeden asqan.
Endi sot oryndaýshylar kommýnaldyq qyzmet kórsetetin kásiporyndarmen birlese qımyldap, tyǵyryqtan shyǵýdyń qatań joldaryn qarastyrýǵa kóshken. Zań aıasynda yqpal jasaý óz nátıjesin birtindep bere bastaǵan sııaqty. Máselen, sot sheshimimen bir turǵynnyń dúnıe-múlki tárkilene bastaǵany sol eken, 450 myń teńge qaryzyn qolma-qol quıǵan. «Tárkilengen dúnıe-múlikterdi satý – uzaqqa sozylatyn prosess. Qaryzgerlerdi tabý da ońaıǵa soqpaıdy. Byltyr − 10, bıyl 3 kólik alyndy. Aralarynda qymbat «temir tulparlar» da bar. Soǵan qaraǵanda, ıeleri baqýatty turatyn sekildi. Ne sebepti ýaqtyly esep aıyryspaıtyny túsiniksiz», deıdi jeke sot oryndaýshy Maqsat Bısekeev. Bereshekterin óteýine baılanysty óndiriske jiberilgen 917 istiń tórtten biri qysqartylǵan.
Búginde 3 turǵynnyń páterlerinen aıyrylatyny belgili bolyp otyr. Olardyń kebin taǵy 4 turǵyn kııýi múmkin.
О́mir ESQALI, «Egemen Qazaqstan»
Soltústik Qazaqstan oblysy
