Búkilálemdik jabaıy tabıǵat qorynyń (WWF) bastamasymen jyl saıyn naýryz aıynyń sońǵy senbisinde tý kóteretin shara bıyl onynshy márte ótkizilip otyr. Bul jahandyq sharaǵa bir mezette 175 memleketten 7 myńnan astam qala qatysyp, elektr jaryǵyn sóndirdi. 2 mıllıardtan astam adamdy qamtıtyn óte aýqymdy ekologııalyq joba osylaısha klımattyń kún sanap ózgerýine kúlli adamzattyń nazaryn aýdarýdy kózdeıdi.
Atalǵan sharada qala ákiminiń orynbasary E.Amanshaev elordada 100-den astam nysan jaryqtaryn óshirip, atalǵan aksııaǵa ún qosyp otyrǵanyn jáne oǵan qatysýshy mádenı mekemeler men áleýmettik nysandardyń jyldan-jylǵa kóbeıip kele jatqanyn jetkizdi. Onyń ishinde «Astana Opera» teatry, «Báıterek» monýmenti, «Máńgilik El» saltanat qaqpasy, Táýelsizdik saraıy, «Haziret Sultan» meshiti, «Alaý» sport kesheni, «Astana-arena» stadıony, Ulttyq mýzeı jáne kópirler men skverler bar. Osylaısha, elordalyqtar búginde ekologııany ońaltý men tabıǵatty qorǵaý máselelerine arnalǵan sharalardyń belsendi qatysýshysyna aınaldy. Parlament Májilisiniń depýtaty Aıgúl Soloveva EKSPO-2017 halyqaralyq kórmesiniń «Bolashaqtyń energııasy» taqyrybyna arnalýy arqyly jasyl kópir mindetin atqaryp otyrǵan Elbasy saıasatyna erekshe toqtaldy. Osy arqyly Qazaqstan qorshaǵan ortany qorǵaý boıynsha álemdegi ınnovasııalyq jobalardyń óristeýine óz úlesin qosady, dedi depýtat. Al «Baıtaq Bolashaq» Ekologııalyq alıansy» RQQ jetekshisi Azamathan Ámirtaıdyń aıtýynsha, elimizde jyl sońyna deıin 18 mıllıon jas óskin otyrǵyzylmaq. Ol osy izgi aksııaǵa barsha qazaqstandyqtardy belsene qatysýǵa shaqyrdy.
Aıta ketken abzal, Búkilálemdik jabaıy tabıǵat qorynyń uıymdastyrýymen elimizde kıikterdi qorǵaý, turan jolbarysyn oraltý syndy birqatar sharalar júzege asyrylýda.
Dýman ANASh, «Egemen Qazaqstan»
