Qazaqstandyq ánshi Dımash Qudaıbergen China Top music Awards sharasynda "Azııanyń eń tanymal ánshisi" atandy, - dep habarlaıdy Tengrinews.kz tilshisi.
Shanhaıda ótip jatqan sharanyń marapattaý rásiminde Dımash Qudaıbergen SOS d'un terrien en détresse ánin oryndady. Bul ándi qazaqstandyq ánshi I am a Singer baıqaýynyń birinshi kezeńinde oryndaǵan bolatyn. Sharaǵa qatysý úshin ánshiniń ákesi Qytaıǵa arnaıy barǵan eken. Marapattaý sátinde Dımash Qudaıbergen tyńdarmandaryna qazaq tilinde alǵys aıtty.
"Assalaýmaǵaleıkúm, qurmetti áleýmet! О́te qatty qýanyshtymyn, qazir. Bul meniń shet eldegi alyp turǵan eń alǵashqy úlken syılyǵym. Eń aldymen men ózimniń ata-anama jáne de jan dosyma kóp raqmet aıtamyn, meni qoldap-demeý bolyp júrgenderine. Jáne de meniń baǵymdy ashqan, álemge tanytyp jatyrǵan "Singer" jobasyna alǵys aıtamyn! Meniń qoldap júretin barsha tyńdarmandaryma raqmet aıtqym keledi! Bar bolyńyzdar, aman bolyńyzdar! Bul tek bastamasy ǵana!!!", - dedi Dımash Qudaıbergen.
Aıta keteıik, Top Chinese Music Awards Qytaıdaǵy Gremmı marapaty retinde tanylǵan. Mýzykalyq júlde 2001 jyldan beri jyl saıyn dástúrli túrde ótip keledi.
