Osyǵan oraı Qazmedıa ortalyǵynda ótken saltanatty rásimge qatysyp, sóz sóılegen Aqparat jáne kommýnıkasııalar mınıstri Dáýren Abaev jaqsylyq joralǵysyna jınalǵan aǵaıyn aldynda aǵynan jaryla «El Arnanyń» alǵashqy qadamyna qutty bolsyn aıtty.
«Búginde televızııa qoǵamdyq sanany qalyptastyrýǵa yqpaly zor qýatty qural ekeni belgili. Osy quraldy ult múddesine, urpaq tárbıesine utymdy paıdalana bilý Memleket basshysy alǵa qoıǵan basty mindetterdiń biri. Kórermenge tek qana ózimizdiń otandyq kórkem jáne derekti fılmderdi usynatyn tanymdyq arna osy maqsatta ashylyp otyr. Altyn qorymyzdy búgingi urpaq ıgiligine jaratýdy kózdegen jańa arnany eldiń arnasy bolsyn degen nıetpen «El Arna» atadyq. Jańa telearna ótken býynǵa ońdy áser etken Sháken Aımanov, Májıt Begalın, Abdolla Qarsaqbaev sııaqty maıtalmandardyń týyndylaryn búgingi urpaqqa keńinen nasıhattaýǵa tamasha múmkindik týdyrmaq. Sonymen qatar, bizdiń maqsatymyz – bilim, ǵylym, óner salasyna arnalǵan derekti fılmder men tanymdyq baǵdarlamalardyń kórermenge barynsha qoljetimdi bolýyna yqpal etý, elimizdiń aqparattyq keńistigin óz týyndylarymyzben qamtý. Bul arnanyń ashylýy kıno salasyndaǵy jas mamandar úshin de úlken qoldaý dep bilemin.
Endi olardyń shyǵarmalary halyqtyń nazaryna keńinen usynylatyn bolady. Sol úshin jobany uıymdastyrý jumystaryna atsalysqan barlyq azamattarǵa alǵys aıta otyryp, jańa arnanyń halyqtyń arnasyna aınalýyna tilektestigimdi bildiremin», – dedi Dáýren Áskerbekuly salmaqty sabaqtaǵan oıyn túıindep.
Iá, egemen elimizdiń erteńi búginde qandaı jastardy tárbıelep jatqanymyzǵa tikeleı baılanysty. Sol sebepti balabaqshadaǵy, mekteptegi, joǵary oqý ornyndaǵy jetkinshekterimizdiń boıyna otanshyldyq sekildi asyl sezimdi kúndelikti sińire berýimiz kerek. Bul mindetti minsiz atqarýǵa árqaısymyzdyń úıimizde turǵan teledıdardyń qomaqty úles qosary talas týdyrmaıdy. Budan shyǵatyn qorytyndy, kógildir ekrannan kórsetiler baǵdarlamalardyń kórkemdik sapasyna, tárbıelik mán-mańyzyna basa nazar aýdarǵanymyz abzal. О́ıtpesek, ókinishke urynyp, opyq jep qalýymyz op-ońaı.
Aıtýly jobany júzege asyratyn «Habar» agenttiginiń Basqarma tóraıymy Almagúl Ahmetjanova tusaýkeser sharasyna kelgenderge shyn kóńilden alǵysyn aıtyp, rızashylyǵyn jetkizdi. Onyń bergen málimeti boıynsha, ekrandyq efırdiń 80 paıyzyn zamanaýı, altyn qorda saqtalǵan, halyqaralyq festıvaldardan júlde alǵan kınotýyndylar quraıtyn kórinedi. Sondaı-aq, kórermenniń oı-órisin keńeıtetin tanymdyq sıpaty mol derekti dúnıelerge de keńinen oryn berilmek. Talaptyń taıyn erttep mingen talantty jas rejısserlerdiń sheberligin ushtaýǵa da qolaıly jaǵdaı jasalmaq eken. Bul, árıne, quptarlyq qadam.
Qazirgi tańdaǵy qazaq rýhanııatynyń qabyrǵaly ókili, fılologııa ǵylymdarynyń doktory Myrzataı Joldasbekov eldik máselelerge erekshe mán beretin ejelgi ádetinen jańylmaı, jarqyn istiń sátimen jalǵasýyna janashyrlyq tanytyp, óziniń aq batasyn berdi. Úlken tebirenis ústinde «El Arnanyń» ashylýy halqymyz kópten kútken aqjoltaı habar ekendigin atap kórsetti. «Eger men umytpasam, osyndaı aıdar taǵylǵan arna buryn da bolǵan. Biraq onyń aty zatyna saı bolmady. Sondyqtan ǵumyry qysqa boldy.
El – halyq, memleket degen sóz. Endeshe, bul búkil eldiń múddesin bildiretin arna bolatynyna senimim mol. Qudaıǵa shúkir, kezinde «Qazaqfılm» kınostýdııasy kópshilik kózaıymyna aınalǵan aıshyqty dúnıeler túsirdi. Solardy jurt saǵynady. Máselen, biz Kúlásh Baıseıitova, Qanabek Baıseıitov, Ǵarıfolla Qurmanǵalıev jáne basqa saıdyń tasyndaı sańlaqtarymyzdyń sahnadaǵy oıynyn kórdik. Sodan rahattanyp, rýhanı lázzat aldyq. Al keıingi tolqyn ókilderi solardyń bárin birdeı bile bermese kerek. Buıyrtsa, endi «El Arna» osy olqylyqtyń ornyn toltyryp, óskeleń órenderimizge mádenıetimizdiń máıegin usynbaq. Jasyryp qaıteıik, keıingi kezderi telearnalarymyzdy baıansyz mahabbatty baıandaıtyn, jylap-syqtaýǵa toly, basy bar, aıaǵy joq sheteldik serıaldar basyp ketti. Keleshekte bul kemshilikterdi túzep, ultymyzdyń asyl qazynalaryn ulyqtaıtyn ulaǵatty kórsetilimderdi tamashalasaq, nur ústine nur bolar edi», – dep Alash ardaqtysy aldymyzdan aq kún týaryna senim artty.
«El Arna» «Habar» agenttiginiń shańyraǵy astynda kóterilgen tórtinshi otaý esebinde áleýmettiń talǵamyna tatıtyn talaı tushymdy teletýyndylardy usynary anyq. Olardy «Galam TV» ınternet-teledıdary portalynyń, «OTAU TV» ulttyq jerseriktik operatory jelisiniń abonentterine arnalǵan tegin paket quramynda 37-arnadan, sondaı-aq búkil respýblıka aýmaǵynda qoljetimdi sandyq spýtnıktik habar taratýdyń ekinshi mýltıpleksinen kórýge bolady.
Mınıstr myrzanyń ruqsatymen iske qosylǵan jańa arnanyń tólbasy retinde tusaýkeserge qatysýshylar nazaryna qazaqtyń kórnekti kompozıtory Shámshi Qaldaıaqovtyń ómirinen syr shertetin «Án-aǵa» fılmi usynyldy.
Sonymen, aqparat alamanyna jal-quıryǵy súzilgen taǵy bir sáıgúlik qosyldy. Olaı bolsa, sol júıriktiń syndarly sátterde súrinbeýin tileıik, aǵaıyn!
Talǵat BATYRHAN, «Egemen Qazaqstan»
Sýretterdi túsirgen
Erlan OMAROV, «Egemen Qazaqstan»
