Bul kúnde Qaraǵandy óńiri jerdi paıdalaný men ony qorǵaý maqsatynda qandaı is-sharalardy júzege asyrýda? Memlekettik baqylaýdyń Qaraǵandy oblysy boıynsha nátıjeleri qandaı? Kimniń jeri óńdelip, kimniń jeri shól bolyp jatyr? Jýyrda Qaraǵandy oblysynyń jerdiń paıdalanylýy men qorǵalýyn baqylaý basqarmasy «Oblysta memlekettik jerlerdi paıdalanylýy men korǵalýy» taqyrybynda brıfıng ótkizdi.
Basqarma basshysy Saıash Ahmetovtiń málimdeýinshe, jeke jáne zańdy tulǵa, memlekettik organdar boıynsha 2016 jyly 1894 ótinish, aryz jáne suranys hattar qarastyrylǵan. Esepti kezeńde 520 tekserý is-sharalary 617,1 myń sharshy shaqyrym kóleminde júrgizilgen.
Tekserý nátıjeleri boıynsha 563,1 sharshy shaqyrym jer kóleminde 435 zań buzýshylyqtar anyqtalyp, 180 zańdy jáne jeke tulǵalarǵa qatysty 37,7 mln teńge ákimshilik aıyppul salynǵan.
Memleketti aýyl sharýashylyǵy maqsatyndaǵy jerlerdi utymdy ári tıimdi paıdalaný jaǵy alańdatady. Saıash Ahmetovtiń baıandamasynda aıtylǵandaı, jer telimderin túgendeý barysynda oblys boıynsha 260 aýylsharýashylyq sýbektileriniń jalpy alańy 533,1 myń gektar jeriniń paıdalanylmaı jatqany anyqtalǵan jáne tıimsiz paıdalanylǵan alqaptarǵa tekseris júrgizilgen. Qadaǵalap tekserý nátıjesinde aýyl sharýashylyǵy maqsatyndaǵy alańy 46,9 myń sharshy shaqyrym jerdegi 11 sýbekti jer zańyn buzýyn toqtatqan.
Qabyldanǵan sharalardyń nátıjesinde, 88,5 myń sharshy shaqyrym bolatyn kútimsiz qalǵan tyń jerler aýyl sharýashylyǵy aınalymyna engizilgen. Ol oblystaǵy jalpy egistikke jaramdy jerlerdiń 22,7 paıyzyn quraıtyn kórinedi. Negizinen mundaı jaǵdaıda quqyqtyq túsindirý jumystary júıeli júrgizilgeni durys. Ol rette basqarma tarapynan birshama naqty qadamdar jasalǵan. Byltyrǵy jyldyń 28 qarashasy men 2 jeltoqsany aralyǵynda túsindirý toby Abaı, Qarqaraly, Nura, Osakarov jáne Ulytaý aýdandarynda osy baǵyttaǵy jumystardy jalǵastyrǵan.
Mıras ASAN, «Egemen Qazaqstan»
QARAǴANDY
