Qoǵamdaǵy talaı-talaı oıly taqyryptardy qozǵap júrgen aıqyndyqtar basylymnyń mereıtoıyn joǵarǵy deńgeıde atap ótti. Aikyn media open dep atalǵan shahmat týrnırine jalpy sany 30 adam qatysty. Qalamy qarymdy tilshiler, aıtýly blogerler, jýrnalıstıka salasynyń maıtalman ardagerleri de búgingi dodadan tys qalǵan joq. Oıyn kópshilikke belgili shveısar úlgisinde ótti. Barlyq 7 týrda jınalǵan upaı sandary eseptelip, úzdikter anyqtaldy. Osyǵan deıin BAQ ókilderi arasynda ótkizilgen birneshe týrnırde top jarǵan «Uıǵyr avazı» respýblıkalyq qoǵamdyq-saıası gazetiniń tilshisi Arslan Alahýnov bıik tuǵyrdan kórinip, Air Astana áýekompanııasy arqyly Tegeranǵa bıznes-klasqa eki ushaq bıletin utyp aldy. Osylaısha, bas júlde retinde berilgen qos bıletpen jeńimpaz osy jyldyń sońyna deıin ózi qalaǵan kúninde Iran astanasyna barýǵa múmkindik aldy. Shahmattan I razrıad ıegeri Qýanysh Súleımen ekinshi oryndy enshilep, «Kerneý Limited» kompanııasynyń atynan tigilgen planshetke ıe boldy. Tartysty dodada úshinshi oryn ıegerin anyqtaý sál qıynǵa soqty. Jalpy, jarys qorytyndysy boıynsha upaı sany teń túsken Qumar Baqdáýlet, Asqat Baıpeıisov, Nurbek Túsiphan, Qanat Qamataev syndy tórt birdeı jýrnalıske úshinshi oryn buıyrdy. Degenmen basqalardan koeffısıent boıynsha daralanǵan Qumar Baqdáýletke qosymsha syılyq retinde planshet tabystaldy.
– Gazetimiz bıyl bir múshelge kelip otyr. Osy aıtýly merekeni qalaı ótkizsek dep kóp oılandyq. Nátıjesinde, shahmattan týrnır ótkizýge bel baıladyq. Bul arqyly jýrnalısterdiń qolynan shahmat oınaý keletinin kórsetip, myqtylar oıynyn keńirek nasıhattaǵymyz keldi. Elimizge belgili jas shahmatshy Jansaıa Ábdimáliktiń shahmat akademııasy ashyldy. Usynysymyzdy jerge tastamaı, osy jerde ótkizýimizge kelisim berdi. Osy sharanyń ótýine atsalysqan barsha jandarǵa alǵys bildirgimiz keledi.Týrnırdi aldaǵy ýaqytta dástúrli túrde uıymdastyryp turamyz degen josparymyz bar, – deıdi «Aıqyn» gazetiniń bas redaktory Nurtóre Júsip.
«Shahmat» – oıyndardyń tóresi. О́z tarapymnan aıtar usynysym bar. «Aıqyn» gazetiniń ujymy keler jyly taǵy ótkizetin bolsa týrnırdi Táken Álimqulovtyń qurmetine qoısa eken. О́ıtkeni qalamger-jýrnalıster arasynda dál Táken aǵaǵa teń keler qarsylas bolmaǵan. О́z aramyzda kishigirim saıystar jıi ótip turady. Ardager bolsaq ta, múmkindiginshe qatysamyz. Igi bastama aldaǵy ýaqytta da jalǵasa berse ıgi», − deıdi týrnırge qatysqan ardager-jýrnalıst Aıan Nysanalın.
Saıys sońynda barlyq qatysýshylar men qonaqtarǵa Nurtóre Júsiptiń «Myń qumyrsqa jáne BIZ» kitaby men Ermahan Shaıhynyń «Qońyr qajynyń kúndeligi» kitaby úlestirilip berildi.
Arman OKTIаBR, «Egemen Qazaqstan»
ALMATY
