QR Memlekettik qyzmet isteri jáne sybaılas jemqorlyqqa qarsy is-qımyl agenttiginde sybaılas jemqorlyq quqyq buzýshylyqtardyń sebepteri men jaǵdaılaryn azaıtý men joıý jumystarynyń qorytyndysyna arnalǵan jıyn ótti. «QR Memlekettik qyzmet isteri jáne sybaılas jemqorlyqqa qarsy is-qımyl agenttigi men «Atameken» Ulttyq kásipkerler palatasy arasynda Jol kartasy bekitildi. Bul kartanyń basty maqsaty – sybaılas jemqorlyqtyń kólemin azaıtý, aldyn alý, sebepteri men saldarlaryn joıý. Osyǵan oraı 16 salany tekserýdi josparladyq. Eń aldymen densaýlyq saqtaý salasy tekserildi. Osy salada normatıvtik-quqyqtyq aktilerdiń sáıkestigin tekserý, oryndaýshylyq-basqarý jumystaryn, memlekettik qyzmet kórsetý, kadr saıasatyn júrgizý máseleleri nazarǵa aldyndy», – dep túsindirip ótti, dep jazady palata.kz.
QR Memlekettik qyzmet jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev. Agenttik tóraǵasynyń orynbasary densaýlyq saqtaý salasyndaǵy birqatar máselelerdi kóterip, málimetterdi keltirdi. Medısınalyq qyzmet kórsetý sapasyn arttyrý memlekettiń saıasatynyń negizgi baǵyttarynyń biri. Atalǵan salanyń qarjylandyrý sońǵy 10 jylda 5 eseden astam ósken. 2005 jyly 191 mlrd teńge bólinse, bul soma 2016 jyly 1 trln-ǵa artqan. Degenmen, Dúnıejúzilik densaýlyq saqtaý uıymynyń halyqaralyq reıtınginde Qazaqstan 145 eldiń arasynda 111-orynda. 2016 jyly 80 laýazymdy tulǵaǵa qatysty 200-den astam sybaılas jemqorlyq qylmysy tirkelgen, 22-si sottalǵan.
«Atameken» UKP Basqarma Tóraǵasynyń orynbasary Rýstam Júrsinov «SK-Formasııa» biryńǵaı dıstrıbıýterinyń jumysyna toqtalyp, jyl sońyna deıin árbir sala boıynsha talqylaý ótetinin aıtyp, óńirlik palatalardy asqan jaýaptylyqpen qaraýǵa shaqyrdy.
«Biz úshin «SK-Farmasııa» jumys tájirıbesi óte aýyr tıip otyr. Bul taqyrypty birneshe ret kóterdik. Biz satyp alýlar tártibi, formýlıar týraly da aıttyq. Alaıda nátıje joq. «SK-Formasııa» aldynda 4 basty maqsat turdy, onyń birinshisi – bıýdjet qarajatyn únemdeý. Alaıda 2010 jyly 31,3 mlrd teńge bolsa, 2016 jyly – 115 mlrd teńge. Anyǵynda «SK-Formasııa» dáneker bolyp otyr. Bizdiń esebimiz boıynsha shamamen 9% ústeme. Básekelestik isi jónindegi agenttik tekserdi, monopolııalyq kiris 26,7 mlrd teńgeni qurady. Qalaı bıýdjet qarajatyn únemdeý týraly aıtamyz? Aıyppuldyń ózi ǵana 1,3 mlrd teńge. Eldiń farmasevtıkalyq salasyn damytý tapsyrmasy oryndalmady», – dedi Rýstam Júrsinov.
Munymen qosa «Atameken» UKP Basqarma Tóraǵasynyń orynbasary medısına salasyndaǵy memlekettik-jekemenshik seriktestik jobasynyń máselesin kóterip, ortaǵa bul jobalardy qalaı júzege asyrý kerektigi týraly saýal tastady.
О́z kezeginde Aqtóbe oblysy О́ńirlik kásipkerler palatasynyń basshysy Nurlybek Muqanov densaýlyq saqtaý salasyndaǵy medısınalyq mekemelerdiń, otandyq atýar óndirýshilerdiń máselelerin kóterdi. Ásirese memlekettik satyp alýlarda otandyq taýar óndirýshilerdi qoldaýǵa basa nazar aýdardy.
«Medısınalyq tehnıkany satyp alý kezinde 2016 jyly Almaty qalasy densaýlyq saqtaý basqarmasy №4 lot boıynsha mammografııalyq apparattyń 126 parametri jazylǵan, tehnıkalyq sıpattamasy tolyqtaı quny 48,9 mln teńge turatyn reseılik ónimdi qaıtalaıdy, al Aqtóbede shyǵarylatyn bul tehnıkanyń balamasy 42,9 mln teńge turady. Al №11 lot boıynsha Reseıde shyǵarylatyn flıýorograf sıpattamasy berilgen, onyń quny 32 mln teńge turady, biraq «Aktıýbrentgen» AQ shyǵaratyn sondaı tehnıkanyń quny 24 mln teńge. Mundaı jaǵdaı Astana qalasynda da oryn alǵan, satyp alýlar nátıjesinde otandyq taýarǵa qaraǵanda 40%-ǵa qymbat reseılik apparat alynǵan», – dep mysal keltirdi Nurlybek Muqanov.
Aqtóbe oblysy kásipkerler palatasynyń basshysy júrgizilgen qoǵamdyq monıtorıng qorytyndysy boıynsha sybaılas jemqorlyq qaýpin joıý maqsatynda QR Densaýlyq saqtaý mınıstrliginiń nazaryna birneshe usynys berdi. Olardyń qatarynda satyp alý prosedýrasyn biryńǵaı portalqurý arqyly elektrondy formatqa aýystyrý, memlekettik-jekemenshik seriktestik sheńberinde óńirlerde medısınalyq klasterdi damytý, tıisti quzyretti jergilikti atqarý organdaryna berý arqyly Biryńǵaı dıstrıbıýter qyzmetin qysqartý usynyldy.
Sonymen qatar, QR Memlekettik qyzmet jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń basshysy Serikbaı Nurǵısaev densaýlyq saqtaý salasynda júrgizilgen tekserý qorytyndysyn baıandady.
«Densaýlyq saqtaý salasy erekshe áleýmettik mańyzǵa ıe. 2016 jyly Almaty oblysynda kórsetilgen 12 mln memlekettik qyzmettik qyzmettiń 6 mıllıony densaýlyq saqtaý salasyna tıesili. 2017 jyly qańtardaǵy málimetke súıensek, oblys turǵyndaryna 826 medısınalyq mekeme kómek kórsetedi. Onyń ishinde 663 mekeme mınıstrlik júıesinde bolsa, 163-i jeke menshikte. Densaýlyq saqtaý salasyna memlekettik qarjylandyrý jyl saıyn artyp keledi, atap aıtqanda Almaty oblysy 2013 jyly 54 mlrd teńge bólinse, 2016 jyly 69 mlrd teńgege ósken. Degenmen, densaýlyq saqtaý salasynda jemqorlyq jaǵdaıy saqtalyp otyr. Bul sala mamandarynyń eńbekaqysynyń tómendigi, tıisti áleýmettik qorǵalmaýy osyǵan sebepker», – dedi Serikbaı Nurǵısaev.
Munymen qosa Almaty oblysy boıynsha densaýlyq saqtaý salasyn tekserý boıynsha birqatar máseleler kóterilip, onyń sybaılas jemqorlyq sebepteri de anyqtalǵanyn, memlekettik qyzmet kórsetýdiń, ásirese anyqtama berýdegi zań buzýshylyqtardy túsindirip ótti. Osyǵan oraı medısınalyq anyqtama berýdi elektrondy úkimet portaly arqyly júrgizýdi usyndy.
Jıyn barysynda QR Parlament depýtattary, QR Densaýlyq saqtaý mınıstrliginiń ókilderi qatysyp, medısınalyq qyzmet kórsetý, medısına salasyndaǵy maman daıyndaý, otandyq farmasevtıka salasynyń ahýaly, mindetti medısınalyq saqtandyrý máselelerin kóterdi.
Memlekettik qyzmet jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev usynystardy joldaýdy surap, «Atameken» UKP birlesip jasap, Densaýlyq saqtaý mınıstrligine joldanatynyn, alty aıdan keıin jumys nátıjesi týraly taǵy da talqylaý bolatynyndyǵyn habarlady.
