Bul jobaǵa qatysqan qarapaıym mamandyq ıeleri ózderin juldyz sezinip, onyń ústine qarjylaı syılyq úshin baq synap kóredi. Jaqsy múmkindik. Jobanyń ıdeıasy tyń, kórermenniń suranysyna jaýap beredi. Onyń ústine, mamandyqtardy jan-jaqty, qyr-syryn ashyp kórsete alsa, jaqsy úrdis qalyptastyra alar edi. О́tken senbi, 25-naýryzda baǵdarlamanyń alǵashqy sany jaryq kórdi. Eleń etkizgen joba bolǵan soń, arnaıy ýaqyt bólip tamashaladyq.
Birinshi oıǵa túıetini – otbasylyq joba. Balaǵa da, úlkenge de birdeı qyzyqty kórindi. Árıne, sozylyńqy tustary bar. Ony sál keıin taldap aıtarmyn. Sahnanyń árlenýi, jaryq qoıylýy sátti. Tehnıkalyq jaǵynan maman bolmaǵandyqtan, tek basqa jobalarmen salystyryp qana aıta alamyz. Sonyń ózinde kózge aıryqsha kórinip tur. Qazylar alqasy asa bir sátti tańdalǵan dep oılaımyn. Tek kompozıtor Arman Dúısenovtiń uıqastyryp maqtaı bergeni bolmasa. Bul qazylar alqasyna arnaıy oılastyrylǵan obraz bolýy da múmkin.
Eki júrgizýshi jigit ashyla qoımady. Barynsha ustamdy. Barynsha klassıkalyq obraz qalyptastyrǵysy keldi. Degenmen, sóz saptaýlary durys, tek ózderin sál erkinirek sezinse eken deısiń. Ol bolashaq baǵdarlamalar enshisinde dep úmitteneıik.
Birinshi baǵdarlamaǵa úsh komanda tańdalǵan eken: órt sóndirýshiler, baılanys qyzmetkerleri jáne kilem toqýshylar. Úsheýi de óte mańyzdy, qyzyqty, tabysty kásip. Top músheleri árkelki. Úlkeni de, kishisi de, eri de, áıeli de bar. Alaıda qatysýshylar men olardyń kásibi týraly jasalǵan sıýjetter olardy tolyq asha almaǵan sııaqty. Qatysýshylar - kamera kórse toqtaı almaı qalatyn estrada juldyzdary emes, qysylyp turǵany kórinip tur. Onyń barlyǵy rejısserlerdiń olarmen jumys istemegeninen dep senimmen aıtýǵa bolady. О́ıtkeni sheteldik jobalarda qarapaıym adamdar juldyzdardan da shıraq sóılep, erkin qımyldaıdy.
Realıtı joba bolǵandyqtan, keıipkerlerdiń shynaıy oqıǵalaryn, bastan keshken qyzyqtaryn, emosııalaryn kórgiń keledi. Alaıda, birinshi shyǵarylym týra osy tusta jutańdaý kórindi.
Al komandalar sahnaǵa shyqqanda múlde basqasha áser aldym. Uzaq daıyndalyp, ár detaldi oılastyrǵan. Sahnalyq kıimderi, qoıylymdary ózgeshe. Osy jerde qatysýshylar da ózderin erkin sezine bastady. Oryndaýǵa tańdalǵan úsh án de tanymaldylyǵy jaǵynan daý týdyrmaıtyn ánder. Tek “Dýdar-aı” ánine sál dınamıkalyq qoıylym jetispegen sııaqty boldy. Al Qaırat Nurtas mýzeıi men batyrlar kóńilden erekshe shyqty. Sol eki topqa otbasymyzben bolysyp otyrdyq.
Ulttyq arnanyń osyndaı qyzyqty joba usynǵany - kórermen pikirine kóńil aýdarǵany. Sondyqtan osy mazmundy jobalar kóbirek shyǵaryla bastaıdy dep senýge bolady. Azdaǵan kemshilikter óndiris kezinde joıylsa, “Án salady mamandar” syndy jobalar kórermen kózaıymyna aınalyp, tynysy keńeıe túser edi.
Gúlnur Qýanyshbekqyzy, "Egemen Qazaqstan"
