Qazaq estrada ánshisi Dımash Qudaıbergenniń ataǵy álemdik deńgeıde shyǵa bastaǵanyn dáleldeıtin aqparat jarııa boldy. «Bul fotoshop emes! Bul álemniń eń jarqyn qalalarynyń biri Nıý-Iork qalasy, Taım Skverdegi eń úlken basty led-dıspleı! 101 FM radıo medıa ortalyǵy tanymal juldyzdar arasynda osyndaı qurmetke ıe bolý úshin báıge jarııalaǵan bolatyn. Qazaq balasynyń álemdik jankúıerleri, Dears-tyń yqpalymen daýys berý arqyly Amerıkanyń tórinde Dımash Qudaıbergenniń sýreti mıllıondarǵa jarııa boldy! Túrli ult-ókilder, Taım Skverdiń kópshiligi endi osynaý basty ekrannan Qazaq ánshisin tanı alady!» dep jazdy (orfografııasy saqtaldy) Dımashtyń prodıýseri Alpamys Shárimov óziniń áleýmettik jelidegi paraqshasynda.
Taıms-skver – Nıý-Iork qalasynyń tarıhı ortalyǵy Manhettendegi Brodveı men Jetinshi avenıý qıylysyndaǵy alań. Qaladaǵy Teatrlar kvartalynyń ortalyǵy. Alań 1904 jyly «Nıý-Iork Taıms» gazeti Times Building ǵımaratyna kóship kelgennen keıin osyndaı ataýǵa ıe boldy. Taıms-skver búginde álemdegi adamdar eń kóp tamashalaıtyn oryndardyń biri. Ol jerge jylyna 50 mln-daı adam keledi. Alańnan kúnine 300 myńnan asa júrginshi, 115 myń júrgizýshi men jolaýshy ótedi. Bul jerde 170 myńdaı adam jumys isteıdi.
Taıms-skver Nıý-Iorktyń ǵana emes, AQSh –tyń sımvoly bolyp sanalady.
