Eń aldymen, «Qazaqstan Respýblıkasynyń keıbir Konstıtýsııalyq zańdaryna memlekettik bıliktiń tarmaqtary arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» Konstıtýsııalyq zańnyń jobasy men «Qazaqstan Respýblıkasynyń keıbir zańnamalyq aktilerine memlekettik bıliktiń tarmaqtary arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» zań jobasy boıynsha baıandama jasaǵan palatanyń, Zańnama jáne sot-quqyqtyq reforma komıtetiniń tóraǵasy Nurlan Ábdirov atalǵan zań jobalary Elbasynyń 2017 jylǵy 25 qańtardaǵy Úndeýinde kórsetilgen tapsyrmasyn oryndaý maqsatynda ázirlengenin, olardyń saıası júıeni demokratııalandyrý, atqarýshy bılik organdarynyń jaýapkershiligi men tıimdiligin arttyrý maqsatyn kózdeıtindigin atap ótti.
Ádilet mınıstri Marat Beketaev Qazaqstan azamattarynyń shet elderde jeke, otbasylyq jáne iskerlik múddelerin quqyqtyq qorǵaýdy jetildirý boıynsha Memleket basshysynyń tapsyrmasyn iske asyrý maqsatynda daıyndalǵan zań jobasy – «Halyqaralyq jeke quqyq jónindegi Gaaga konferensııasy Jarǵysyn ratıfıkasııalaý týraly» baıandady. Bul qujat Halyqaralyq jeke quqyq jónindegi Gaaga konferensııasynyń jumysyna qatysýdy usynady. Al atalǵan uıymǵa álemniń 81 memleketi men Eýropalyq odaq kiredi.
«Bul uıymnyń maqsaty – halyqaralyq jeke quqyq normalaryn birizdendirý jáne osy saladaǵy memleketterdiń yntymaqtastyǵyna járdem kórsetý bolyp tabylady. Negizinen, Gaaga konferensııasynyń aıasynda 39 konvensııa jasalǵan bolsa, olardyń barlyǵy da azamattyq is júrgizý sheńberinde quqyqtyq kómek kórsetýge baǵyttalǵan», – dedi baıandamashy.
Sondaı-aq, mınıstrdiń aıtýynsha, Qazaqstannyń Gaaga konferensııasyndaǵy halyqaralyq zań shyǵarýshylyq jumysyna tikeleı qatysyp, shet elde bizdiń azamattarymyzdyń quqyqtary neǵurlym tıimdi qorǵalýyn qamtamasyz etedi. Sonymen qatar, bul uıymǵa múshelik Gaaga konferensııasynyń saıasatyn belgileıtin Keńestiń jumysyna qatysýyna da múmkindik beredi. Jalpy ister jáne saıasat boıynsha Keńes otyrysy jyl saıyn Turaqty bıýro arqyly uıymdastyrylady.
Osylaısha, halyqaralyq sheńberde atqarylatyn sharýaǵa qatysty jan-jaqty túsinik bergen baıandamashyǵa depýtattar tarapynan saýaldar da qoıyldy. Sonyń biri – konferensııa quramynda Qazaqstan atynan áreket etetin múddeli mekeme týraly bolatyn. Oǵan Ádilet mınıstri bylaı dep jaýap berdi: «Konferensııa músheleri men Turaqty bıýro arasyndaǵy ózara is-qımylǵa járdemdesý maqsatynda árbir múshe memlekettiń úkimeti – ulttyq organdary jáne árbir múshe uıym baılanys jasaıtyn organdy taǵaıyndaıdy. Biz bul mindetti atqarýǵa Ádilet mınıstrligin usynyp otyrmyz. Árıne, ony áli de naqtylaı túsemiz», – dedi M.Beketaev.
Májilis komıtetteriniń oń baǵasyna ıe bolǵan atalǵan Jarǵy jalpy otyrysqa qatysqan 105 depýtattyń tarapynan biraýyzdan maquldandy.
Ekinshi oqylymda kún tártibine shyǵarylǵan negizgi baıandamanyń biri – «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý týraly» zań jobasyna arnaldy. Bul jóninde baıandaǵan Májilistiń Áleýmettik-mádenı damý komıtetiniń múshesi Natalıa Jumadildaeva zań jobasy dene shynyqtyrý men sportty qarjylandyrýdyń qoldanystaǵy júıesin jetildirý maqsatynda ázirlengenin aıtty.
Zań jobasynyń tanystyrylymyna deıin jumys tobynyń 7 otyrysy ótip, oǵan tıisti sala mamandary men qoǵamdyq birlestikterdiń jáne úkimettik emes uıymdardyń ókilderi qatysqan. Depýtattar tarapynan 70-ke jýyq usynys túsip, olar boıynsha tıisti sheshimder qabyldanǵan dene shynyqtyrý jáne sport máseleleri boıynsha túzetýlerge arnalǵan zań jobasy osylaısha ekinshi oqylymda maquldandy.
Sonymen qatar, depýtattar jer qatynastaryn retteýge baılanysty zań jobasyn jumysqa qabyldap, qylmystyq-atqarý zańnamasyn jetildirý máselelerine arnalǵan zań jobasy boıynsha Senat engizgen ózgeristerge kelisim berdi.
Nurlybek DOSYBAI,
«Egemen Qazaqstan»
