Oqyrman suraý salady
Kógildir otynnyń baǵasy aspandap tur
Jambyl oblysynyń Shý aýdanynda aýyl-aımaqty gazdandyrý máselesi búginde halyqty qıyn jaǵdaıda qaldyryp otyr. Máselen, «QazTransGaz Aımaq» merdigerleri tarapynan Shý qalasy men Kókqaınar, Belbasar, Eńbekshi, Jańa jol, Qonaev, Birlik, Kóktóbe aýyldaryna gaz qubyrlaryn júrgizý úshin ár úıden 300-350 myń teńge aralyǵynda aqsha alyndy. Al «Parıev» JShS merdigeri 20 myńnan asa turǵyny bar Tóle bı aýylynyń ár úıinen peshsiz, ólsheýish quraldarynsyz 570 myń teńgeden talap etýde. Ol ol ma, Tóle bı aýylynan on shaqyrym qashyqtyqtaǵy Abaı aýyly turǵyndarynan bir mıllıon teńgeden talap etken.
Osyndaı turaqsyz, qarapaıym halyqtyń qaltasy kótermeıtin baǵanyń kesirinen Tóle bı, Abaı aýylymen qosa taǵy on shaqty eldi meken áli kúnge gazben qamtamasyz etilmeı otyr. Al gaz qubyrlaryn júrgizý jumystary kezinde baǵa 420 myń teńgege kóterildi. Keıin 2016 jyldyń basynan 570 myń teńgege bir-aq sharyqtap ketti. Mundaı somany qarapaıym halyq múldem tóleı almaıdy. Aýdan ákimdiginiń halyqqa aldyn ala eskertpeı, «Parıev» JShS-men hattama jasasqany kúmán týǵyzady. Sol sebepti aýdanaralyq prokýratýra osy máseleni qolǵa alyp, bir shara qoldanady degen úmittemiz.
Jambyl oblysy turǵyndarynyń atynan
Máken ÝAQTEGI
Tóle bı aýyly,
Shý aýdany
...úlgi tutady
Qarııalarǵa qamqorlyq jasaıyq
«Nur Otan» partııasynyń «Ardagerlerdi ardaqtaıyq!» aksııasy aıasynda Mańǵystaý aýdandyq fılıalynyń «Jas Otan» jastar qanaty bastaýysh partııa uıymynyń músheleri Shetpedegi tyl jáne eńbek ardagerleriniń úılerine baryp áleýmettik qoldaý tanytýda. Alǵashqy bolyp partııa belsendileri shetpelik tyl jáne eńbek ardageri Tursyn Jylqybekovanyń shańyraǵynda boldy. Jastar aldymen 90 jasqa jaqyndaǵan ardagermen suhbat júrgizip, búgingi turmys jaǵdaıymen tanysty. Omyraýyndaǵy ordenderi men medaldary – qarııanyń tyldaǵy eńbekteriniń kýási. Aıta keteıik, aýdanda qazir 169 tyl ardageri bar. Al aýdan ortalyǵy Shetpede 30-dan astam ardager tirlik etedi. Barlyǵy «Ardagerlerdi ardaqtaıyq!» jobasynyń shapaǵatyn kórmek. Shara aıasynda jastar tyl jáne eńbek ardagerleriniń úılerine baryp, esik aldyn tazalap, qol kómegin sozdy.
Aldash ShOŃAI
Mańǵystaý oblysy,
Mańǵystaý aýdany
...úmit artady
Kezegim jyljıtyn túri joq...
«Úı bolmaı, kúı bolmaıdy» dep durys aıtylǵan. Kópten beri kúıim bolmaı júrgen jandardyń birimin. Turǵyn úı kezegine budan jeti jyl buryn turǵan bolatynmyn. Alaıda kezegim alǵa qaraı jyljymaı tur. Buǵan deıin jaǵdaıymdy Aqtóbe qalalyq turǵyn úı kommýnaldyq sharýashylyq bólimine baryp aıtqanmyn. Biraq odan eshqandaı nátıje shyqpady.
Taıaýda ótinishimdi Aqtóbe qalalyq máslıhatynyń hatshysy Sulýtań Shyntasovaǵa bildirdim. Ol meni «Turǵyn úı qurylys jınaq Banki» AQ dırektorynyń orynbasary Talǵat О́tebaevqa jiberdi. Bul azamat maǵan kezekte turǵandarǵa depozıt tegin ashylatynyn aıtty. Osyǵan oraı aldaǵy sáýir aıynda ótetin konkýrsqa qatysýym kerek eken. Onyń aıtýynsha kezegim boıynsha úı alýǵa bolady eken. Orynbasardyń áńgimesinen túsingenim, bul konkýrstyń talaptary óte joǵary sekildi. Ol depozıt boıynsha ball esepteledi degen máselelerdi aıtty. Qysqasy, qazirgi kúni de munyń ózi týmaǵan sıyrdyń sary ýyzyna uqsap ketpese eken dep alańdaı beremin.
Aqmarjan ShORAEVA,
Qarǵaly selolyq okrýgine qarasty perzenthana akýsheri
Aqtóbe
...oı bólisedi
Bala oqytqannan dop qýǵan jaqsy...
Dúnıede myńdaǵan mamandyqtardyń ishindegi eń qıyny da, qurmettisi de, mártebelesi de – ustaz mamandyǵy. Al ustazdyq etýden jalyqpaı, san urpaqqa júrek jylýy men meıirim shýaǵyn tókken ustazdyń búgingi tańdaǵy hal-ahýaly qandaı dárejede? Qazir ustazdar qaýymy burynǵydaı emes, aılyq eńbekaqysyn ýaqytynda alady. Oǵan da shúkir. Biraq alyp otyrǵan jalaqysy bir otbasyn asyraýǵa jete me? Búgingi tańda basynda nesıesi joq muǵalim kemde-kem.
Endi qarańyz, fýtbolshylardyń jaǵdaıy ustazdardykinen áldeqaıda keremet eken. Men bul jerde olarǵa qyzǵanyshpen qarap otyrǵan joqpyn. О́zim sport jankúıeri bolǵandyqtan, árıne, elimizde sporttyń túr-túriniń damýyna qýanamyn. Olardyń eńbekteriniń de óz ereksheligi bar. Degenmen, elimizde ustazdardyń quny sportshylarǵa qaraǵanda óte tómen baǵalanatyny meni qýanta qoımaıdy. Fýtbol komandasynyń bir oıynshysyna 2016 jylǵy málimet boıynsha aı saıyn 9 mıllıon teńge jalaqy tólenipti. Bul degenimiz – biraz muǵalimniń aılyǵy ǵoı. Uzyn sózdiń qysqasy, ulaǵatty ustaz ben fýtbol oıynshysynyń eńbekaqylaryndaǵy aıyrmashylyq – jer men kókteı.
Osy jaıttardy eskere otyryp, jas urpaqtyń bolashaǵyna alańdap, samaı shashy aǵarǵanǵa deıin balalarǵa bilimi men tárbıesin berip, aıanbaı eńbek etip kele jatqan ulaǵatty ustazdyń mártebesi nege óte tómen?! Aldaǵy ýaqytta bul máselege tıisti dárejede kóńil bólinse óte oryndy bolar edi. Áıteýir eldiń, urpaqtyń bolashaǵy úshin eńbek etip júrgen ustazdar qaýymynyń da jaǵdaıy jaqsarady degen úmittemin.
Qaırat OMAROV,
ustaz
Shymkent
...qaýip etedi
Oıyna kelgen baǵany qoıatyny nesi?!
Keńestik kezeńde «alypsatar» degen uǵym jurttyń záresin alýshy edi. Qazir bul sóz jıi qoldanylmasa da, qaptaǵan dúkenderdegi taýar baǵalary osy alypsatarlyqty eske túsirip jatqandaı. Oǵan mysal retinde myna bir jaǵdaıdy aıta keteıin. Jaqynda bir sýpermarketten ózim jaqsy kóretin «Jokeı Arabıka Trıýmf» degen kofeniń eń kishkentaı ydystaǵysyn satyp aldym. Kofeniń bul túri Almaty dúkenderinde sırek bolady, baǵasy – 590 teńge. Taǵy birde sút almaq bolyp, «SMALL» (Rozybakıev pen Myńbaev kósheleriniń qıylysyndaǵy) sýpermarketine bardym. Jańaǵy 590 teńgelik «Jokeı Arabıka Trıýmf» degen kofem bul jerde 990 teńge eken. Oıpyr-aı! Bul ne bolǵany sonda?! Sýpermarkettiń shekesindegi «Bizde óte tómen baǵa!» degen jazýy ótirik bolǵany ma?! Bul dúkendegi taýarlardyń baǵasy eń tómen emes, eń qymbat qoı! Sodan oılana kele, bul degenimiz burynǵy alypsatarlyqtyń búgingi túri eken ǵoı dep topshyladym. «Alypsatar» degen uǵym ashyq qoldanylmasa da, dúkender oıyna kelgen baǵany qoıyp, onyń esesin qaıtaryp jatyr eken.
Quttybek QYBYRAIULY
Almaty
