Batys Qazaqstan oblysy tutynýshylardyń quqyqtaryn qorǵaý departamenti qyzmetkerleri sońǵy kezde saýda oryndaryna qarapaıym tutynýshy retinde baryp, saýda jasap, satyp alǵan taýarlardy zerthanadan ótkizýdi ádetke aınaldyrǵan.
– Byltyr departament tarapynan tekserýler 2015 jylmen salystyrǵanda 2,5 esege azaıdy. Qazirgi tártip boıynsha saýda ornyn jylyna bir-aq ret teksere alamyz, onyń ózinde 1 aı buryn eskertýge tıispiz, – deıdi oblystyq tutynýshylardyń quqyqtaryn qorǵaý departamentiniń basshysy Jaıdar Qurmanov.
Árıne, memleket tarapynan kórsetilip otyrǵan qoldaýdy teris paıdalanyp, qarapaıym tutynýshynyń quqyǵyn eskermeı ketetin «kásipkerler» de tabylady. Biraq, olardy da áshkereleýdiń joly tabylǵan. Batysqazaqstandyq sanıtarlar oblys aýmaǵyndaǵy eldi mekenderdiń halyq kóp baratyn saýda oryndarynan halyqtyń basym bóligi tutynatyn taýar ónimderin arnaıy satyp alady. Bul úshin memleketten arnaıy qarjy bólingen. Osy taýarlar departamenttiń túrli zerthanalarynda saraptamadan ótkizilip, qalypqa saı kelmeıtin, zań buzýshylyq faktileri bolsa, kináliler jaýapqa tartylady.
Máselen, 2016 jyly 2430 ónim sanıtarlyq-epıdemıologııalyq saraptama júrgizý úshin satyp alynyp, zerthanadan ótkizildi. Onyń 70 paıyzdan astamy tamaq ónimderi. Tekserilgen taýardyń ishinde 619 ónimnen (25,4%) túrli dárejedegi sáıkessizdik anyqtalǵan. Mysaly, keıbir taýardyń jazýy mazmunyna saı emes, keıbiriniń mıkrobıologııalyq quramynda aýytqýshylyq tabylǵan. Tekserýler nátıjesinde qyzmetinen kemshilik tabylǵan kásipkerlerge 192 uıǵarym berildi. 24 oqıǵa boıynsha aıyppul salynǵan. Aıyppuldyń jalpy somasy – 5 514 600 teńge.
Qazbek QUTTYMURATULY,
«Egemen Qazaqstan»
ORAL
