Alǵashqy kúnderi jeńsiz kamzoldary bar birneshe kelin kóılek satylypty. Kamzoly anadaı bolsyn, kóıleginiń túsi mynadaı bolsa eken degendeı, azdap bolsa da tapsyrystar da túse bastaǵan.
Qazir barshamyzdyń basymyzdy qatyrǵan bir másele – sán men ulttyq dástúrdi úılestirý. Ulttyq naqyshy bar kıimderdi barshaǵa unamdy, zamanaýı úlgide tigý. Kóshege kıip shyqqanda, kóz súısinerlikteı talǵamǵa kóterý. Sondyqtan bolar, biz bul jańalyqqa eleń ettik.Áý bastan ismerlikke beıim aktrısa buǵan deıin de óziniń shaǵyn sheberhanasynda óte sándi ulttyq naqyshtaǵy perdeler, tósek japqyshtar tigip, bólek qyrymen tanylyp júrgen bolatyn. Árıne, ulttyq, sahnalyq kıimder de tigip júr. Biraq, oǵan suranys sırek. Al kelin kóılektiń jóni bólek. Kelin túsirýden úmit etpeıtin úı joq.
– О́zim kelin bolyp túskende qyp-qyzyl qytaı halatyn kıip, kópshilikke shaı quıǵan bolatynmyn. Kún ystyq bolyp, qonaqtar ketken soń qarasam, qyzyl halattyń boıaýy deneme ábden juǵyp qalypty. Sol kezde nege qazaqsha «kelin kóılek» tikpeıdi eken dep oılap qoıǵanmyn. Mysaly, ózbek halqynda kelinder shaı quıǵanda, toıǵa barǵanda, qadirli qonaqtar kelgende, kórshilerdi kútkende kıetin túrli-túrli kóılekteri bolady. Kelin bolyp túskennen keıin kúnde sony kezegimen tańerteń kıip shyǵady. Oramaldary men basqasyn da soǵan úılestirip kıedi.
Biz kelin kóılekterdiń úlgisin barynsha qarapaıym, oıýlary názik, tústeri asa bajyraımaǵan, kózge jumsaq, denege yńǵaıly etip tigýge umtyldyq. Jeńderi men beline rezeńke saldyq. Ol qyzmet jasaǵanda, ydys-aıaq jýǵanda yńǵaıly, túrip alǵanǵa jaqsy. Keıbir kamzoldardyń jaǵasyna azdaǵan jasandy eltiri salyp, tigip kórdik. Ádemi shyqqan syńaıly. О́ıtkeni, ulttyq kıim úlgilerimiz teri, bylǵaryǵa jaqyn, – deıdi Gúlsharat Jubaeva.
Aınash ESALI,
«Egemen Qazaqstan»
ALMATY
