Nysandy aralaý barysynda B.Saǵyntaevqa «Nur Aqtóbe» turǵyn úı alabyndaǵy turǵyn úılerdi salý barysy, jobalyq sheshim erekshelikteri jáne beriletin páterler sapasy týraly baıandaldy, dep jazady pm.kz.
Nysandardyń qurylysynda paıdalanylatyn materıaldardyń 65% jergilikti kásiporyndarda óndiriletinin aıta ketken jón.
“Nur Aqtóbe” turǵyn úı alabynda shamamen 151 gektar aımaqty alatyn birneshe shaǵyn aýdan bolady. Jobanyń birinshi kezeńinde 423 kóppáterli úı salyný josparlanǵan.
Qazirgi tańda turǵyn úı qurylysy bastalyp ketti. Páterlerdiń sharshy metri 120 teńgeden aspaıdy. Al 2018-2020 jyldary osy aımaqtaǵy 380 gektar jerge 1819 nesıelik úı boı kótermek.
2017-2018 jyldary “Nur Aqtóbe” turǵyn úı alabyndaǵy “Taýnhaýs” tıpti 60 úıdiń qurylysy qolǵa alynady. Osy arqyly 2500 otbasy baspanaly bolmaq.
Barlyǵy «Nurly jer» baǵdarlamasy boıynsha Aqtóbe oblysynda 2017 jyly 500-den kem emes az qabatty turǵyn úı salý josparlanyp otyr, bul turǵyn úı kezeginde turǵan 700-den astam otbasyny qolaıly baspanamen qamtamasyz etýge múmkindik beredi. Bul osy óńir úshin erekshe ózektilikke ıe, sebebi QR Prezıdentiniń tapsyrmasy boıynsha, munda aýqymdy aglomerasııa damyp, Aqtóbe qalasy zamanaýı ýrbanıstik ortalyqqa aınalýy tıis.
Eske sala keteıik, QR Prezıdenti N. Nazarbaev óziniń «Qazaqstannyń úshinshi jańǵyrýy: jahandyq básekege qabilettilik» atty Joldaýynda «Nurly jer» turǵyn úı baǵdarlamasyn júzege asyrýdy Úkimettiń taıaý keleshektegi basymdyqty mindetteriniń biri retinde atap kórsetken, sebebi baǵdarlama aldaǵy 15 jylda 1,5 mıllıon otbasyn turǵyn úımen qamtamasyz etýge baǵyttalǵan.
