Atalǵan kerýen 26 mamyr kúni Tarazdaǵy «Tórtkúl» kerýen saraıynan saltanatty túrde attanady. Astana qalasyna deıingi jol júrý ýaqyty shamamen 60 kúndi quraıdy. Al, kerýen tizbeginde 30 túıe, 10 salt atty, 5 arba, 15 avtokólik bolady. Sonymen qatar, kerýenshiler quramynda qoǵam qaıratkerleri, zııaly qaýym ókilderi, Qazaqstan halqy Assambleıasynyń jáne qoǵamdyq uıymdardyń ókilderi men ónerpazdar, qolónershiler, at sportynyń ókilderi bolady. Bul aıtýly sharaǵa Aqmola men Qaraǵandy oblystarynyń qatysýy óńiraralyq yntymaqtastyqty kórsetedi.
– Kerýen Taraz qalasynan shyǵyp, Astana qalasyna jetkenshe árbir toqtaıtyn pýnktterde EKSPO-2017 kórmesin nasıhattaýǵa baǵyttalǵan is-sharalar uıymdastyrylady. Ol jerde kıiz úıler tigilip, úlken sahna, shatyrlar ornatylady. Qazaq eliniń turmys-tirshiligi, salt-dástúrleri kórsetiletin kórinister, ulttyq sport oıyndary, konserttik baǵdarlamalar uıymdastyrylady, – deıdi oblys ákimdigi mádenıet, arhıvter jáne qujattama basqarmasynyń basshysy Dúısenáli Byqybaev.
Kerýenshiler EKSPO-2017 kórmesine barar jolda «Úshbulaq» kerýen saraıyna, Qulan aýylyna, sondaı-aq, Merki, Shý, Moıynqum aýdandaryna toqtap, odan keıin Qaraǵandy oblysynyń Saryshaǵan aýylyna, Balqash, Qaraǵandy qalalaryna da aıaldaıtyn bolady.
Hamıt ESAMAN,
«Egemen Qazaqstan»
Jambyl oblysy
