Otyrysty ashqan «Nur Otan» partııasy Tóraǵasynyń birinshi orynbasary 2006 jyly Memleket basshysy óziniń aýqymy jaǵynan teńdesi joq ákimshilik reformalardyń bastaý alýyna serpin bergenin eske saldy. Sol kezde Prezıdent tarazynyń bir basynda memlekettik qyzmet alýshylardyń múddesi, sondaı-aq, ozyq halyqaralyq tájirıbeler eskerilgen korporatıvtik basqarý, ashyqtyq pen eseptilik qaǵıdattary turatyn memlekettik basqarýdyń sapaly jańa úlgisin qurýǵa kiriskenimizdi atap ótken bolatyn. Nátıjesinde, bizdiń el postkeńestik keńistikte birinshi bolyp «Memlekettik qyzmet týraly» Zań qabyldady jáne memlekettik qyzmet isteri jónindegi arnaıy ókiletti organ qurdy.
«Bul máselege aıryqsha úńilý qajettiligi memlekettik apparattyń sapaly qyzmeti eldiń turaqty damýyn qamtamasyz etetin jáne ýaqyttyń jyldam ózgerip otyratyn syn-tegeýrinderine der kezinde jaýap qaıtaratyn sheshýshi faktorlardyń biri bolyp tabylatynymen baılanysty bolyp otyr», – dedi óz sózinde Muhtar Qul-Muhammed.
Sondaı-aq, «Nur Otan» partııasy Tóraǵasynyń birinshi orynbasary: «Bıylǵy jyly Memleket basshysynyń bastamasymen Qazaqstan Konstıtýsııasyna tarıhı túzetýler engizildi. Ol memlekettik basqarýdyń túbegeıli jańa úlgisiniń negizin qalady. Atqarýshy bıliktiń ókilettigi aıtarlyqtaı ulǵaıdy, sonymen birge, barlyq deńgeıdegi memlekettik qyzmetkerlerdiń jaýapkershiligi kúsheıdi. Sondyqtan sapaly jańa apparatty qalyptastyrý jónindegi Elbasy alǵa qoıǵan mindetter múltiksiz oryndalýǵa tıis. Bizge zańdylyqty qatań saqtaıtyn, kásibı jaǵynan bilikti jáne jaýapkershiligi zor memlekettik qyzmetkerler kerek», – dedi.
Buǵan qosa, jıynda kásibı memlekettik apparatty qalyptastyrý Bes ınstıtýttyq reformanyń birinshi baǵyty ekeni aıtyldy. Máselen, «100 naqty qadam» Ult josparynyń osy máselege arnalǵan 15 qadamynyń 11-i tolyq júzege asyrylǵan. Atap aıtqanda, «Memlekettik qyzmet týraly» jańa Zańnyń arqasynda merıtokratııa, ıaǵnı anaǵurlym laıyqty jáne kásibı mamandardy basshylyq qyzmetke ilgeriletý qaǵıdatyna negizdelgen mansaptyq ósýdiń jańa úlgisi engizildi. Nátıjesinde, 2016 jyly 6 myńnan astam memlekettik qyzmetkerdiń mansaby joǵarylady. Bul 2015 jylǵymen salystyrǵanda 4 ese kóp. Budan bólek, komandalyq aýysýdy aıtarlyqtaı deńgeıde azaıtýǵa qol jetkizilgen. Máselen, ótken jyly ol 2015 jylmen salystyrǵanda 18 esege deıin kemipti.
Is-shara aıasynda sóz alǵan Memlekettik qyzmet isteri jáne sybaılas jemqorlyqqa qarsy kúres agenttiginiń tóraǵasy Qaırat Qojamjarov partııalyq tyńdaý barysynda memlekettik apparatty jańǵyrtý týraly egjeı-tegjeıli áńgimelep berdi. «Elbasymyz qolǵa alǵan jańǵyrtý úderisteri ishindegi «100 naqty qadam» Ult jospary boıynsha birinshi baǵyt bizdiń agenttikke júktelgen. Depýtattardyń qoldaýymen zań qabyldandy. 1 jyldaı sol zańnyń talaptaryna sáıkes jumys atqaryp kelemiz. Árıne, osy ýaqyttyń ishinde birqatar ózekti máseleler aıqyndalyp otyr. Al ol máselelerdi biz búkil halyq bolyp sheshýimiz kerek. Eń bastysy, ol – halyqtyń bılikke degen senimi. Ekinshiden, memlekettik organdardyń halyqtyń múddesine jáne Elbasynyń strategııalyq maqsat-mindetterine saı jumys atqarýy», – dedi Qaırat Qojamjarov.
Sondaı-aq, jıyn barysynda memlekettik qyzmet salasyndaǵy ózgeristerge qatysty oı-pikirler aıtyldy. Dáliregi, mansaptyq ilgerileý biliktilik talaptaryna baılanysty júzege asatyny, bul kásibı memlekettik apparatty jaqsartýǵa múmkindik beretini atap kórsetildi. Buǵan qosa, memlekettik qyzmetshiniń tek qyzmet ótili ǵana emes, sonymen qatar, onyń sheshimderdi qabyldaı bilýi, eger, ol basshy bolsa, ujymdy basqara alýy, ony belgili bir maqsattarǵa yntalandyra alýy sekildi biliktilikteri nazarǵa alyndy.
Partııalyq tyńdaýdy qorytyndylaı kele, «Nur Otan» partııasy Tóraǵasynyń birinshi orynbasary el Prezıdenti belgilep bergen memlekettik qyzmetti reformalaýdyń túpki maqsaty halyq pen memleket múddesin bárinen joǵary qoıatyn kásibı memlekettik apparat qalyptastyrý bolyp tabylatynyn atap ótti.
Láıla EDILQYZY,
«Egemen Qazaqstan»
