Onyń sanatyna Petropavl qalasy, Taıynsha, Aqqaıyń, Esil, Qyzyljar aýdandaryna qarasty 95 aýyl, 1,5 myńdaı turǵyn úı, 5 myńǵa jýyq turǵyn jatqyzylyp otyr. Budan tysqary 280 shaqyrym joldy sý shaıyp ketýi múmkin. О́te-móte qaýip tóndirip otyrǵany – Sergeev sý qoımasy. О́ıtkeni, qazirdiń ózinde arnasy shópildep tola bastaǵany baıqalady. Esil ózenindegi muzdyń kóbesi sógilip, seń júre bastaǵan kezde Petropavl sý torabyndaǵy shlıýzder amalsyz ashylady. Demek, ózen boıyndaǵy eldi mekender men oblys ortalyǵy birtalaı qıyndyqqa kezigedi degen sóz. Bul–ázirge aldyn ala boljaý ǵana. Bıyl qar ádettegiden kóp túskenin jáne jerdiń tońy jibimeı jatyp, qarǵyn sýdyń saı-salany qýalap jatqanyn eskersek, alda ne kútip turǵany belgisiz. Erte kóktemniń eń qıyndyǵy osynda, deıdi jergilikti sınoptıkter.
Jaǵdaı qansha kúrdeli desek te, oń ahýal qalyptastyrý jan-jaqty ázirlik sharalaryna tikeleı baılanysty ekeni aıtpasa da túsinikti. Tabıǵattyń tosyn «minezine» qarsy saqadaı-saı daıyndyqtar ǵana aıtarlyqtaı shyǵynǵa uryndyrmaı, mal-jannyń qaýipsizdigin qamtamasyz ete alary anyq. Qumar Irgebaıulynyń tóraǵalyǵymen ótken apparattyq keńeste kóktemgi sý tasqynyna baılanysty máseleniń egjeı-tegjeıli talqylanýy sondyqtan. Tótenshe jaǵdaılar jónindegi departamenttiń bastyǵy Pavel Fılıppov usynǵan málimetter boıynsha qaýip tóngen aýmaqtardy qarǵyn sýdan qorǵaý úshin aryqtar qazylyp, sý ótkizgish qubyrlardy almastyrý belsendi atqyrylýda. 1 mıllıon tekshe metr qar shyǵarylǵan. Aýdandyq mańyzǵa ıe joldardaǵy qubyrlardyń − 98, respýblıkalyq joldar boıynsha 93 paıyzy tazalanǵan. 60 eldi mekende ınjenerlik jumystar júrgizilip, 70 shaqyrym qorǵanys beketteri turǵyzylǵan. Petropavl qalasyndaǵy Bylǵary shaǵyn aýdanyndaǵy bóget, Mamlıýt stansasy mańaıyndaǵy aryq qurylǵylary qalpyna keltirilip, Býlaevo qalasyndaǵy kóldiń aınalasy tereńdetilgen.
Turǵyndardyń qaýipsizdigin qamtamasyz etý sharalaryna 2713 jeke quram, 867 tehnıka, 133 júzý quraly, 200 motopompa, 656 jol-qurylys tehnıkasy jumyldyrylatyn bolady. 7,7 myń tonna qıyrshyqtas, 4,8 myń tonna qum, 9,5 myń tonna sazbalshyq qaýipti jerlerge jetkizilgen. 26 gıdrotehnıkalyq qurylys jiti baqylaýǵa alynǵan. Tótenshe jaǵdaılar jónindegi departament bastyǵynyń sózine qaraǵanda, barlyq jerlerde qoldaǵy múmkindikter tıimdi paıdalanylyp otyrǵan joq. Máselen, Taıynsha aýdanynyń Kellerovka eldi mekeninde keı bógetterdiń talapqa saı kelmeıtini anyqtalǵan. Sol sııaqty, Esil aýdanyndaǵy Úlken Torańǵul kóliniń sýyn sıfondy qubyrlar arqyly aǵyzý úrdisi báseń. Chırıkov aýylynda sý aǵyzý toǵandary tazalanbaǵan. Oblys ortalyǵynda uzyndyǵy 11,2 myń metr bolatyn ashyq sýaǵarlardyń tórtten biri ǵana arshylǵan. Qar kúrt erise, aǵyn sý kóshelerge jaıylýy ábden yqtımal.
Qala ákimi Marat Tasmaǵanbetov óz esebinde sý basý qaýpi zor Jumysshy, Bereke, Oıqala shaǵyn aýdandary men Zarechnyı kentinen 700 myń tekshe metr qar syrtqa tasylǵanyn, taıaý kúnderi barlyq sýaǵarlar qalpyna keltiriletinin, oǵan 108 tehnıka tartylǵanyn jetkizdi. Tipti, Reseıdiń Ekaterınbýrg qalasynan aryqtardy tazalaıtyn arnaıy tehnıka aldyrtylǵan.
Aımaq basshysy tasqynnyń aldyn alýǵa baılanysty kezek kútpeıtin mindetterdi atap kórsetti. Basty talap – oblys turǵyndarynyń qalypty ómirine eshqandaı qaýip tónbeýi tıis. Tótenshe jaǵdaı oryn alǵan jaǵdaıda adamdardy qaýipsiz jerlerge kóshirý, jyly kıimdermen, ystyq taǵamdarmen qamtý, qoǵamdyq tártip jaıy keshendi júrgizilýi tıis. Qar der kezinde shyǵarylsa, sý aǵatyn qubyrlar ýaqytynda tazalansa, bári din aman bolatynyn eskertti. Sý tasqynyna qarsy is-sharalardy uıymdastyrýǵa 561 mıllıon teńge qarastyrylyp, ınertti materıaldar men janar-jaǵarmaıdyń jetkilikti qory jınaqtalǵan.
Petropavl jáne Sergeev sý qoımalary, sáıkesinshe, 90 jáne 95 paıyzǵa tolǵanyn, sý tasqyny sáýir aıynda kútilip otyrǵanyn eskersek, saqtyq jumystaryn bir sát te bosańsytýǵa bolmaıdy.
О́mir ESQALI,
«Egemen Qazaqstan»
Soltústik Qazaqstan oblysy
