Naýryz tek belgili kúnderde ǵana toılanatyn mereke emes. Aı boıy atap ótseń de artyq etpeıtin aıtýly dýman. Búgingi sharanyń maqsaty naýryzdyń qadir-qasıetin uǵynyp, ulyq merekeniń dańqyn áspetteýge arnaldy. Tamyry tereńde jatqan túbi bir túrki halyqtaryna ortaq merekeniń artyqshylyqtary jaıly keńinen aıtyldy. Búkil Jer-Anany býsandyryp álemge shýaq syılaıtyn, jan bitkendi jadyratyp janyńa shuǵyla quıatyn shýaqty shaqtyń ádemi kórinisi shara barysynda oqylǵan baıandamalarda keń mazmunda kórinis tapty.
Qazaqstan halqy Assambleıasynyń atynan jıylǵan qaýymdy quttyqtaǵan Parlament Májilisiniń depýtaty Ahmet Mýradov: «Naýryz kún men tún teńelgen, bereke men birlikti nyǵaıtatyn uly mereke. Onyń ótkeni men búginin, ómirimizdegi mańyzy men artyqshylyqtaryn jas urpaqtyń sanasyna sińdirip, keleshek jastarǵa úlgi etý – bárimizdiń mindetimiz. Árbirimiz bul kúndi erekshe kútemiz. Beıbitshilik pen tatýlyqtyń arqasynda osyndaı kúnge jetip otyrmyz», dedi.
– Biz úshin bul kúndi erekshe atap ótý úlken mánge ıe. Bir dastarqannan dám tatyp, arazdasqan jandar tatýlasyp baq-yrysqa keneletin bul meıram – barshamyzdyń ortaq qundylyǵymyz. Aıtýly mereke elimizdiń ár aımaǵynda atap ótilýde. Jastarymyzdyń salt-dástúrdi qurmettep, osy mereke arqyly tatýlyq qarym-qatynasty nyǵaıtyp baýyrlasýy úshin bul kúnniń mańyzy zor, – dedi Uıǵyr etnomádenı ortalyǵy basshysynyń orynbasary Súleıman Maksýtov.
Shara aıasynda «Qazaqstan uıǵyrlary etnomádenı ortalyǵy» músheleri sýretshileriniń kórmesi tamashalanyp, uıǵyr halqynyń ulttyq taǵamdaryna toly dastarqan jaıyldy. Is-sharanyń sońy «Qosh keldiń, áz-Naýryz» dep atalǵan merekelik konsertke ulasyp, ulttyq sport oıyndary oınatyldy.
Arman OKTIаBR,
«Egemen Qazaqstan»
ALMATY
