Alǵashqy oıyndaǵy jeńilisti qaperinde ustaǵan óskemendikter birden alǵa umtyldy. Alaıda, alǵashqy shaıbany birinshi bolyp jiberip aldy. 3-mınýtta qonaqtar sapynan Andreı Korabeınıkov qaqpany dál kózdep, «Rýbındi» alǵa shyǵardy. О́z jankúıerleriniń aldynda óner kórsetip jatqan shyǵysqazaqstandyqtar alǵashqy kezeńde tarazy basyn teńestirý úshin baryn saldy. Gol soǵatyn múmkindikter bolǵanmen, sáttilik joldas bolmady.
Esesine jerlesterimiz oıynnyń kelesi bóliginde túmendikterdi eki márte qapy qaldyrdy. 33-mınýtta Evgenıı Rymarev mergendigimen kózge tússe, araǵa tórt mınýt salyp ekinshi goldyń avtory atandy. Bul tusta reseılikterdiń bir oıynshysy kem bolǵanyn aıta ketken jón.
Matchtyń úshinshi kezeńi de dál osy baǵytta órbidi. Á, degennen-aq alǵa umtylǵan Alekseı Jdahın shákirtteri 41-mınýtta úshinshi shaıbany soǵyp úlgerdi. Bul shaqta Evgenıı Rymarev het-trıgin jasaǵan edi. Negizgi ýaqyttyń aıaqtalýyna sanaýly mınýttar qalǵanda qonaqtar qaqpashyny aıdyndaǵy oıynshyǵa almastyryp, janushyra alǵa umtylǵan bolatyn. Alaıda, bul da «Torpedo» úshin oraıy kelgen múmkindik boldy. Leonıd Metalnıkov bos qaqpany alystan dál kózdep, sońǵy núkteni qoıdy.
Alǵashqy oıynda 0:1 bolyp utylǵan óskemendikter osylaısha ese qaıtardy. Qos komandanyń arasyndaǵy jalpy esep 1:1. Kelesi eki match 1 jáne 2 sáýir kúnderi Túmende ótedi.
Aıan ÁBDÝÁLI,
«Egemen Qazaqstan»
