«Tıtýldy aıqasqa deıin biz taǵy bir márte reıtıngti kezdesý uıymdastyrýdy jón kórdik. Jekpe-jek Máskeý qalasyndaǵy «Boks akademııasynda» ótetin boldy. Fırýza óz deńgeıin arttyrýy tıis. Árıne, tıtýldy kezdesý ótkizý basty josparlarymyzdyń biri», – dedi Sergeı Zavıleıskıı.
Sońǵy kezdesýine boksshy qyz jaraqat alǵan kúıi shyqqany habarlanǵan. Al medısınalyq tekseristen ótkennen keıin oǵan 21 kúnge judyryqtasýǵa bolmaıtyny eskertildi. О́z kezeginde Sergeı Zavıleıskıı Fırýzany 22 sáýirden keıin ǵana sharshy alańǵa shyǵatynyn málimdegen bolatyn.
«Dárigerler úsh aptaǵa shekteý qoıdy. Al bul merzim 25 naýryz kúni aıaqtaldy. Búgin ol sparrıng kezdesý ótkizdi. Deńgeıi bárimizdiń kóńilimizden shyqty. Árıne, úlken kezdesýlerge shyǵa almaıdy. Biraq reıtıngti aıqas ótkize alady dep oılaımyz», – dedi ol.
Fırýza Sháripovanyń bul jolǵy qarsylasy da anyqtalypty.
«Bul jolǵy qarsylasymyz 30 jastaǵy reseılik Vıktorııa Kotova. Osyǵan deıin ol jaýyngerlik sambo, qoıan-qoltyq urys, kıkboksıng jáne dzıýdomen shuǵyldanypty. Al qazir kásibı bokspen aınalysyp júr», – dedi Sháripovanyń menedjeri.
Aıta keteıik, 4 naýryz kúni qazaqstandyq boksshy reseılik Iýlııa Chernoborodovamen kúsh synasyp, tóreshilerdiń biraýyz sheshimimen jeńiske jetken bolatyn.
