Stýdentter saıysyn joǵary deńgeıde ótkizýdiń bar amalyn qarastyrǵan Ýnıverısada-2017 dıreksııasynyń málimdeýinshi, bul jarysta 236 744 bılet satylyp, jalpy Ýnıverısada tarıhynda eń kóp adam qyzyqtaǵan sporttyq sharanyń biri bolǵan. «Ýnıversıada tarıhynda eń joǵary deńgeıde uıymdastyrylǵan jarys – Qazaqstanda ótken stýdentter saıysy», – dep álemdik aqparat quraldarynyń jarysa jazýy da elimiz úshin úlken maqtanysh bolǵany ras.
Rasynda, ońtústik astanamyzda qysqy sport túrlerine arnalǵan sý jańa nysandar boı kóterdi. Qazir sol záýlim sport saraılarynyń ishinde sporttyń birneshe túrinen úıirmeler ashylyp, jas órenderimizdiń sportqa degen qyzyǵýshylyǵy kún sanap artyp keledi. «Qystyń qamyn jaz oıla» degendeı, qysqy sporttyń jaıyn jazda oılaǵannyń zııany joq. Mysaly, qysqy sport túrlerinen álemde kósh bastaǵan AQSh, Norvegııa, Nıderland, Shvesııa, Kanada sekildi memleketterdiń taýly aımaqtarynda qysqy sport túrlerinen baıraqty jarystar turaqty ótkizilip turady. Eýropa halyqtary qysqy sportty damytý aıasynda túrli jobalardy jyl boıy iske asyryp jatady eken.
Sondyqtan bolar, Eýropa elderiniń ókilderi qysqy sport túrlerinen álemdik jarystarda top jaryp, jeńis tuǵyrynan kórinip jatady. Biz olardyń ónerine qyzyǵa da qyzǵana qarap jatamyz. Degenmen, ózimizde bar qanshama múmkindikti tıimdi qoldana almaımyz. Qazaqstan halqyna Jaratýshynyń ózi taý dese taý, sý dese sý, dala dese dalany berip qoıǵan. Qys ýaqytymen kelip, ýaqytymen ketedi. Tek alǵa umtyl, sportpen aınalys. Tabıǵat bar baılyǵyn qazaqtyń keńpeıil kóńiline tartý etken. Sol barymyzdy uqsata bileıik. Qazirgi tańda qysqy sport túrlerinen Qazaqstannyń álem arenasyndaǵy aıaq alysy jaman emes. Ásirese, ótken Ýnıversıada, Azııa oıyndary men álem chempıonattarynda el qorjynyna altyn-kúmisten olja salǵan Iýlııa Galysheva men Dmıtrıı Reıherdterdiń tamasha jetistikteri álem elderiniń Qazaqstanǵa degen qurmetin eseleı tústi. Janbota Aldabergenova sekildi qarakózderimizdiń de tabysty joly qazaq qyzdaryna úlgi boldy. Degenmen, ósem degen elge jan-jaqty jumysty toqtatpaǵan lázim. Qysqy sportty damytý isin aýyl-aımaqtan bastaǵan jón. Árıne, qaladaǵy sport ǵımarattary el ıgiligine qyzmet eteri haq. Al elimizdiń qarly óńirlerinde qysqy sportqa durys kóńil bólinbeýi jón emes, árıne. Bala kezimizde kóshede hokkeı oınaýshy edik. Sonda qolǵa túsken ımek taıaqty alyp oınaı beretinbiz. Qazir sport dúkeniniń esigin ashsań, ne kerektiń bári bar. Bir ǵana másele, jastardyń osy qysqy sport túrlerine degen qyzyǵýshylyǵyn oıatatyn sharalardy kóbeıte túsý qajet. Bul másele otbasylyq tárbıeniń de negizine kirgeni abzal.
Aqyn Ordabaıuly
