Kezdesýde K.Másimov Memleket basshysyna Ulttyq qaýipsizdik komıtetiniń ózge quqyq qorǵaý organdarymen birlesip, «EKSPO-2017» halyqaralyq kórmesine daıyndyq aıasynda qaýipsizdikti qamtamasyz etýge baǵyttalǵan tıisti sharalardy atqaryp jatqanyn baıandady, dep habarlaıdy Aqordanyń resmı saıty.
Qazaqstan Prezıdenti aldaǵy ýaqytta «EKSPO-2017» kórmesimen qatar álemdik deńgeıdegi basqa da aýqymdy sharalar ótetinin eske saldy.
– Bıyl birqatar halyqaralyq is-sharalar bolady. Memleketter men úkimetter basshylary, parlament músheleri, sondaı-aq shet elderden jáne óz elimizden týrıster kóptep keledi dep josparlanyp otyr. Osyǵan oraı, sol is-sharalardyń tıisti deńgeıde uıymdastyrylýyn qamtamasyz etý máselelerin pysyqtaý qajet. Eń aldymen qaýipsizdik máselesine nazar aýdarý kerek, – dedi Nursultan Nazarbaev.
Sondaı-aq, Memleket basshysy basqa elderde bolyp jatqan terrorlyq aktilerge toqtalyp, ondaı jaıttarǵa jol bermeý úshin tıisti jumystar júrgizý, sonyń ishinde shet elderdegi áriptestermen ózara is-qımyl ornatý qajettigin aıtty.
K.Másimov Elbasyǵa mundaı aýqymdaǵy is-sharanyń qaýipsiz ótýi, sondaı-aq terrorızmmen jáne dinı ekstremızmmen kúres Ulttyq qaýipsizdik komıtetiniń, basqa da quqyq qorǵaý organdarynyń udaıy baqylaýynda bolatyny jóninde málimdedi.
