– Aslan, «Ertis» sapyndaǵy alǵashqy resmı oınyńda mergendik tanyttyń. Jalpy, jańa komandańnyń alǵashqy matchy jaıly pikirińdi bilsek...
– Men úshin erekshe match boldy. Bastysy, óz alańymyzda jankúıer qaýymdy qýanttyq. Kúnniń salqyndyǵyna qaramastan, bizdi qoldaýǵa kelgen pavlodarlyqtarǵa alǵysymyz sheksiz. Al «Ertistegi» alǵashqy resmı oıynda kózge túskenime qýanyshtymyn. Bul gol – meni odan ári jigerlendire tústi. «Aqjaıyqpen» bolǵan match jaıly aıtar bolsam, oraldyq klýb qorǵanysqa kóp kóńil bóldi. Alaıda, biz qajetti úsh upaıdy enshiledik. Alǵashqy oıynda jeńiske jetý komandadaǵy senimdilikti kúsheıtedi.
– Nelikten «Ertisti» tańdadyń?
– «Ertiske» aýysý týraly áńgime bir jarym jyl buryn týyndaǵan bolatyn. Sebebi, men almatylyq «Qaırattyń» sapynda negizgi quramǵa sırek shyǵyp júrdim. Al maǵan oıyn tájirıbesi kerek. Osyny ańǵarsa kerek, pavlodarlyq klýbtyń basshylyǵy habarlasyp, meni «Ertisten» kórgileri keletinin aıtty. Biz kelisimshart jaıyn ózara aqyldastyq. «Qaırat» klýbymen kelisimshartym aıaqtalǵan soń, «Ertiske» aýystym. Bul komandany tańdaýymnyń da ózindik sebepteri bar. Birinshiden, «Ertistiń» bapkeri Dımıtar Dımıtrov – el chempıonatyndaǵy sheteldik úzdik bapkerlerdiń biri. Ekinshiden, «Ertis» – jaqsy oıynshylarmen jasaqtalǵan myqty ujym. Klýb ótken maýsymda chempıonatty úshinshi orynmen támamdady. Al bıyl Eýropa lıgasynda el namysyn qorǵaıdy. Mine, osynyń barlyǵy «Ertisti» tańdaýyma sebepshi boldy.
– Komandaǵa beıimdelý qıynǵa soqqan joq pa?
– Joq. Barlyq oıynshylardy burynnan bilemin. Davıd Lorııamen «Shahter» sapynda birge oınadyq. Aleksandr Kıslısynmen bala kúnimnen tanyspyn. Bir aýlada ósip, erjettik. О́zge oıynshylarmen ulttyq qurama sapynda birge dop teptik. Endi birimen chempıonat barysynda jolymyz túıisti. Legıonerlerden basqasy bir-birin syrttaı biledi ǵoı. Sondyqtan, komandaǵa beıimdelý qıynǵa túsken joq.
– Bas bapker Dımıtar Dımıtrovpen jumys istegen qalaı eken?
– «Ertiske» aýysqanda bapkerdiń ózi maǵan qyzyǵýshylyq tanytqanyn estidim. Ol meni óz komandasynda kórgisi keletinin aıtypty. Árıne, bul týraly estigende qatty tolqydym. Dımıtardaı myqty bapkerdiń kózine ekiniń biri túse bermeıdi dep oılaımyn. Ol meni únemi qoldaıdy jáne jartylaı qorǵanystyń ortasyn maǵan senip tapsyrdy. Men ózime artylǵan jaýapkershiliktiń zor ekenin bilemin. Sondyqtan, artylǵan senimdi aqtaýǵa tyrysamyn.
– О́tkenge oralaıyqshy. Fýtboldaǵy jolyń qalaı bastalǵan edi?
– Barlyq balalar sekildi men de aýla fýtbolynan bastadym. Sosyn Rýslan Qarjaýbaev jetekshilik etetin áýesqoı komandaǵa alyndym. Ol meniń oıyn mánerimdi naqtylap, match aldyndaǵy psıhologııalyq daıyndyqty úıretti. Fızıkalyq ázirligimniń irgetasyn qalady. Rýslan Qarjaýbaevtyń jetekshiligimen úlken fýtboldyń álippesin úırendik. Qysta shaǵyn fýtboldy serik etetinbiz. Sondyqtan, meni keıde «mını-fýtbolshy» dep ataıtyndar bar. Áste, olaı emes. Iá, meniń alǵashqy kásibı klýbym «Tulpar» men «Ikar» klýbtarynyń birikken komandasy boldy. Sońǵysynyń sapynda bir maýsym ǵana óner kórsettim. Sosyn «Gefest» quramasyndaǵy birneshe fýtbolshymen birge «Shahterdiń» qosalqy quramyna aýystym. Klýbpen kelisimshartqa otyrdyq. Osylaısha, fýtbolshy retindegi ǵumyrym bastaldy.
– Fýtbolda kimderge qarap boı túzeısiń?
– Zınedın Zıdandy qadir tutamyn. Sondaı-aq, Andrea Pırlo, Inesta men Havıdi jaqsy kóremin. Olar – sapaly fýtboldyń etalondary. Máselen, Zıdannyń alańdaǵy oıyndy kóre bilýi, match barysynda bar kúshin sarqa jumsaıtyny, qımyl-qozǵalysy unaıdy. Munyń bárin sózben jetkizý múmkin emes. Ony kórý kerek.
– Fýtboldan qolyń bosaǵanda nemen aınalysasyń?
– Bala-shaǵamdy ertip kınoǵa baramyn. Serýendeımiz. Motıvasııalyq ádebıetterdi oqyǵandy unatamyn.
– Otbasyń jaıly aıta ketseń...
– Eki kishkentaıym bar. Taǵy bireýin kútip otyrmyz. Úlken ulym – úsh jarym jasta. Qyzym – ekide.
– Ulyń ákesiniń jolymen júrer me eken, álde ómirlik kásibin ózi tańdaı ma?
– Árıne, tańdaýdy ulymnyń ózine qaldyramyn. Bastysy, jaqsy adam bolyp qalyptassa bolǵany. О́z-ózine senimdi bolyp, ómirde baǵynbaıtyn beles joq ekenin jaqsy túsinse eken deımin. Meniń mindetim – balalaryma durys tárbıe darytý, ómirde jol tańdaýda baǵyt-baǵdar berý.
– Bıylǵy maýsymda aldyńa qandaı maqsat-mindet qoıyp otyrsyń?
– Meılinshe, kóp gol soǵý, jaqsy pastar berý. Bastysy – komandanyń tabysyna úles qosý jáne Eýrododada nátıjeli óner kórsetý.
– Áńgimeńe rahmet.
Áńgimelesken
Farhat Ámirenov
PAVLODAR
