Sharaǵa elimizdiń Parlament Senaty men Májilisiniń depýtattary, Mádenıet jáne sport mınıstrliginiń, mádenıet salasynyń uıymdary men mekemeleriniń basshylary, Qazaqstan teatrlarynyń dırektorlary men kórkemdik jetekshileri qatysty.
Senattyń Áleýmettik-mádenı damý jáne ǵylym komıtetiniń tóraıymy Birǵanym Áıtimova kezdesýdi asha kelip, memleketimizde mádenıetti damytý men klassıkalyq jáne halyq óneriniń úzdik dástúrlerin saqtaý úshin barlyq jaǵdaı jasalǵanyn atap ótti. Álemdik mádenı keńistikke yqpaldasý úshin barlyq sharalar qabyldanýda. Normatıvtik- quqyqtyq erejelerdiń negizi jasaldy, mádenıet salasynyń zańdary men zańnan keıingi quqyqtyq aktiler qabyldandy, ınfraqurylym damyp keledi, Mádenı saıasattyń tujyrymdamasy men otandyq mádenıetti damytýǵa yqpal etetin basqa baǵdarlamalyq qujattar qabyldandy.
Senatordyń aıtýynsha, mádenı muraǵa baı jáne shyǵarmashylyq áleýetke ıe Qazaqstan halqyn álemniń 30 damyǵan eliniń qataryna kirý maqsatyna qol jetkizýge shaqyrǵan Memleket basshysynyń «Máńgilik El» ulttyq ıdeıasyn, Qazaqstan Prezıdenti N.Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» Joldaýyn, Qazaqstan Respýblıkasynyń Mádenıet saıasatynyń tujyrymdamasyn iske asyrý úshin Parlament depýtattary «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» zań jobasyn ázirlegen bolatyn.
B.Áıtimova Parlament depýtattarynyń bastamasymen ázirlenip, Senatqa túsken zań jobasynda osy máseleler kórinis tapqanyna senim artatynyn jetkizdi. Onyń pikirinshe, zań jobasynyń aıasynda osy saladaǵy kóptegen mańyzdy máseleler sheshiletin bolady. Máselen, teatrlardyń aldyna qoıylǵan mindetterdi belgileý, teatrlardyń ishki máselelerin retteý, qoıylymdarǵa ózge shyǵarmashylyq qyzmetkerlerdi tartý, teatr-
larda kórkemdik keńester men qoıylym toptaryn qurý zań júzinde belgilenedi.
Kezdesýde negizgi baıandamany Arystanbek Muhamedıuly jasady. Ol mádenıet salasyn odan ári jańǵyrtýdyń negizgi erejeleri týraly jan-jaqty habardar etti. Bastamashylar atynan Parlament Májilisiniń depýtaty M.Aısına zań jobasyndaǵy negizgi túzetýlerdi tanystyrdy. Elimizdiń «Mádenıet týraly» Zańynda Qazaqstan halqynyń mádenı murasyna jatatyn basylymdardy saqtaý jáne jarııa etýdi júzege asyratyn Qazaqstan Respýblıkasy Ulttyq memlekettik kitap palatasynyń mártebesi belgilendi; basylymdardyń tegin danasyn Ulttyq memlekettik kitap palatasyna, al elektrondyq nusqada «Ortalyq» mártebesine ıe kitaphanaǵa mindetti túrde berý mindeti bekitildi.
Odan basqa, zań jobasymen mádenıet mekemeleri men teatrlar qyzmetine qatysty máselelerdi retteý, qoǵamdyq mańyzy bar ádebıetterdi satyp alý, basý jáne taratý, sondaı-aq mádenıet salasynyń ýákiletti organdarynyń quzyretin naqtylaý usynylyp otyr.
M.Áýezov atyndaǵy Qazaq memlekettik akademııalyq drama teatrynyń kórkemdik jetekshisi Asanáli Áshimov, Q.Qýanyshbaev atyndaǵy Qazaq memlekettik akademııalyq mýzykalyq-drama teatrynyń kórkemdik jetekshisi Talǵat Temenov, M.Gorkıı atyndaǵy Memlekettik akademııalyq orys drama teatrynyń dırektory ári kórkemdik jetekshisi Erkin Qasenov, M.Lermontov atyndaǵy Memlekettik akademııalyq orys drama teatrynyń dırektory Iýrıı Iаkýshev, Qýyrshaq teatrynyń kórkemdik jetekshisi Quralaı Eshmuratova jáne basqalar teatr ónerin damytý týraly usynystar aıtyp, sóz sóıledi.
Senat depýtattary Aqan Bıjanov, Álı Bektaev, Serik Bekturǵanov, Jabal Erǵalıev, Sársenbaı Eńsegenov jáne Sergeı Ershov otandyq teatrdy jáne teatr ónerin damytýdyń keleshegi, jalpy mádenıet salasynyń máseleleri týraly óz oılaryn ortaǵa saldy.
Kezdesýdi qorytyndylaı kelip, B.Áıtimova mádenıet salasyndaǵy mesenattyq pen demeýshiliktiń alýan túrleri keńinen qoldanylatyn Izraıl, Italııa, AQSh sekildi elderdegi úzdik halyqaralyq tájirıbelerdi mysalǵa keltirdi. Qazaqstanda da sondaı qadamdardy yntalandyrý qajettigin atap ótip, otandyq teatr mádenıetin saqtaý men aıasyn keńeıtý qajettigi jáne onyń jalpy memlekettik mańyzyna toqtaldy, sondaı-aq aıtylǵan máselelerdi sheshýde depýtattyq korpýs pen memlekettik qurylymdardyń kúsh-jigerin biriktirýdi usyndy.
Nurlybek Dosybaı,
«Egemen Qazaqstan»
