Keshe atalmysh mınıstrlikke qaraıtyn «Kásipqor» holdıngi» kommersııalyq emes aksıonerlik qoǵamynyń baspasóz máslıhaty bolyp, elimizde úshinshi jyl qatarynan ótkizilip kele jatqan WorldSkills Kazakhstan jobasy týraly keńinen baıandaldy.
Jobanyń maqsaty – jumysshy mamandyqtarynyń mártebesin arttyrý jáne sheberlik daǵdylaryn damytý. WorldSkills kásiptik bilimniń damýyna oń áserin tıgizedi. Onyń chempıonattary eki jylda bir ret ár memlekette ótedi. oǵan 22 jasqa deıingi kolledj jáne ýnıversıtet stýdentteri, bilikti jas mamandar, sonymen qatar, tanymal mamandar, kásipqoılar, óndiristik oqytý sheberleri men tapsyrmalardy oryndaýdy baǵalaıtyn sarapshy retindegi nusqaýshylar qatysady. Úmitkerler 76 qatysýshy memlekettiń óńirlik kásiptik chempıo-
nattarynan irikteledi. Olar ózderiniń shynaıylyqqa barynsha jaqyn tapsyrmalardy sheshe otyryp, jeke jáne ujymdyq sapasyn, tehnıkalyq qabiletterin kórsetedi.
Komandalar nátıjeleri tek qatysýshylardyń jeke kásibı sapasyn ǵana emes, sondaı-aq, jeke kásiptik daıyndyq deńgeıi men qatysýshylar kelgen eldiń qyzmet kórsetý sapasynyń deńgeıin de kórsetedi. 2014 jyly Qazaqstan WorldSkills assosıasııasyna 76-shy qatysýshy memleket bolyp tirkeldi. 2015 jyly Qazaqstanda WorldSkills Kazakhstan Ulttyq chempıonaty ótkizildi. 2016 jylǵy ulttyq chempıonat nátıjesinde qurylǵan ulttyq qurama músheleri EuroSkills halyqaralyq chempıonatyna «kirpish qalaý», «qurǵaq qurylys pen sylaq jumystary», «plıtamen qaptaý», «dánekerleý jumystary», «elektr-montaj jumystary» boıynsha qatysty. WorldSkills Kazakhstan mıssııasy – kásiptik baǵdar mehanızmin, mamandardy daıarlaý jáne eńbek ónimdiligin arttyrýdy qosa alǵanda, halyqaralyq standarttar negizinde tehnıkalyq mamandyqtar boıynsha óndiris oryndary salasyn joǵary tehnologııalyq mamandarmen qamtamasyz etý mehanızmin qurýǵa úlken úles qosady», dedi Bilim jáne ǵylym mınıstrligi tehnıkalyq jáne kásiptik bilim departamenti halyqaralyq jobalar jáne seriktestik baǵdarlamasynyń basshysy Raýza Shırgatova.
Jıyn barysynda «Kásipqor» holdıngi» kommersııalyq emes aksıonerlik qoǵamynyń basqarma tóraǵasy Nurǵalı Rymǵalıuly bul rette holdıngtiń atqaryp jatqan jumystaryna da toqtalyp ótti.
«Jańa ındýstrııaǵa óndiristi kóteretin, jumys berýshilerdiń talabyna saı keletin mamandar qajet. Sondyqtan biz, birinshiden, bilim berýdiń mazmunyna qaraımyz. Sebebi, óndiristegi tehnıkalyq ózgerýge baılanysty mazmun da ózgeredi. Osyǵan baılanysty bilim mazmuny da sodan qalmaı qatar júrip otyrýy kerek. Ekinshi – oqý-ádistemelik quraldarmen tolyq qamtý. Úshinshi – sabaq beretin ınjener-pedagogtardyń bilim deńgeıin kóterý jáne jumys berýshilermen qoıan-qoltyq baılanys jasaý», dedi ol.
Sonymen qatar, ol dýaldy oqytýdyń máni men mańyzyna toqtalyp, keńinen túsindirip ótti. «Qazirgi ýaqytta elimizde 400-den astam kolledj dýaldy oqytýmen aınalysady. 2300-deı jumys oryndary stýdentterdiń tájirıbeden ótýine atsalysýda. Ol bilikti maman daıarlaýda mańyzdy qadam deı alamyn. Sol sebepti biz bıyldan bastap dýaldy oqytýǵa qatysatyn jumys oryndaryna ádistemelik kómek kórsetkimiz keledi», dedi Nurǵalı Rymǵalıuly.
Raýan Qaıdar,
«Egemen Qazaqstan»
