Qazaq tilindegi onlaın kýrs ashý ıdeıasy burynnan bar. Bul zańdy da, sebebi, eń sapaly onlaın kýrstardyń 75 paıyzy aǵylshyn tilinde. Odan keıingi orynda, árıne, orys tildi portaldar. Al, qazaq tilinde múlde jetkiliksiz, barynyń sapasy tómen, kópshilik bile bermeıdi. Bilmegen soń árıne, tutynýshylar da asa kóp bola qoımaıdy. Osy jaǵynan alǵanda ınternet arqyly alǵashqy dárisin oqyǵaly jatqan «Qazaqstannyń ashyq ýnıversıteti» jobasynyń mańyzy zor. Ras, buryn ınternet arqyly oqý tek shet tilin jetik meńgergen, arǵy-bergi shet el ýnıversıtetterinde oqyp kelgen jastar úshin ǵana qoljetimdi dúnıe kórinetin-di. Al, atalǵan jobanyń artyqshylyǵy – negizgi aýdıtorııasy qazaqtildi orta bolmaq. Jáne jas talǵamaıdy. Mektep oqýshylarynan bastap zeınetkerlerge deıin onlaın kýrsty tegin qoldana alady.
Konferensııanyń moderatory, «WikiBilim» qoǵamdyq qorynyń prezıdenti Nurbek Matjanıdyń sózine qaraǵanda, Qazaqstannyń barlyq saladaǵy ǵylymı jetistigi eshqandaı shet elden kem emes. Sondyqtan, qazaqsha dáris tyńdaý tutynýshylarǵa ǵana emes, elimizdiń joǵary oqý oryndary lektorlary men ǵalymdarynyń oıyn iske asyrýyna múmkindik beredi.
OpenU jobasy talapkerler men stýdentterge ǵana emes, belgili bir salada jumys istep júrgen, sonyń ishinde IT jáne telekommýnıkasııalar mamandaryna da paıdaly. Múmkindigi shekteýli jandar men ortalyqtan shalǵaıda ornalasqan aýdan jáne aýyl turǵyndary da óz qyzyǵýshylyǵy boıynsha dáris tyńdaı alady.
Bul platforma Garvard ýnıversıteti men Massachýsets tehnologııa ınstıtýty mamandary jasaǵan Open edX negizinde qurylǵan. Saıtta túısikti ınterfeıs, yńǵaıly beınepleer,
kýrs tyńdaýshylarynyń jeke kabıneti, test tapsyrmalary men konspektiler ornalastyrylǵan. Jobanyń birinshi kezeńinde IT, telekommýnıkasııa jáne bıznes salalaryna qatysty 10 kýrs ázirlengen. Ashyq ýnıversıtettiń alǵashqy lektory belgili qazaqstandyq ǵalym, fızıka-matematıka ǵylymdarynyń doktory, professor, QR UǴA akademıgi Asqar Jumadildaev boldy.
«Bul – zaman talaby. Osyny jasap júrgenderdiń bári jastar – bilimdi, jan-jaqty, zamanyn tanyǵan qyz-jigitter. Aǵylshynsha, oryssha, eń bastysy, qazaqsha biledi. Qazaqsha aýyzeki tilde sóıleýge bolady, biraq, ǵylymı dárejede til bilý ońaı sharýa emes. Qazaq tilin ǵylymı aınalymǵa engizetin osyndaı jastar. Qazaq emosııamen, obrazben uǵady. Matematıkany obrazben túsindirý kerek, sonda este qalady. Bul alǵashqy kezeńde óte mańyzdy. Osy kezeńdi sátti támamdaǵan talapker ári qaraı eshkimge des bermeıdi. Sol jaǵynan alǵanda, bul onlaın kýrs-
tardyń mańyzy óte joǵary», dedi akademık óz kezeginde. Sondaı-aq, matematıka osy bir
kýrspen toqtap qalmaýǵa tıis ekenin, kem degende dál osyndaı jıyrma baǵytta kýrs ótkizý kerek bolatynyn aıtty.
Almas Núsip,
«Egemen Qazaqstan»
Sýretti túsirgen
Nurmanbet Qızatuly
ALMATY
