Taraz qalasy prokýratýrasynyń júrgizgen saraptamasy qalada uzaq ýaqyttan beri esirtki saýdasymen aınalysqan turaqty qylmystyq topty anyqtady. Taldaý nátıjesine sáıkes, Jambyl oblysy prokýrorynyń jeke bastamasyna oraı, jedel izdestirý sharalary qolǵa alynyp, 18 naýryz kúni kúdiktilerdiń turǵyn jaılaryna tintý sharalary júrgizilgen bolatyn. Nátıjesinde qylmystyq top jetekshisi men onyń 8 sybaılasy jalpy quny 2 mıllıon 500 myń teńge turatyn 2,5 keli geroın esirtkisimen ustaldy.
Qazirgi ýaqytta barlyq kúdiktiler sot sanksııasymen sotqa deıingi tergeý sharalary úshin qamaýǵa alyndy. Al qylmystyq isti anyqtaý, tergeý oblystyq ishki ister departamentiniń Tergeý basqarmasyna tapsyrylǵan. «Quqyq qorǵaý organdarynyń barlyq kúshi uıymdasqan qylmystyq toptarmen kúreske baǵyttalýy tıis», dedi bul másele jóninde oblys prokýrory Ernat Sybanqulov.
Jalpy, 2017 jyldyń basynan beri 225 qylmystyq quqyq buzýshylyq tirkelgen. Onyń 96-sy esirtki qylmysy bolsa, qalǵan 129-y qylmystyq teris qylyq bolyp sanalady. Esirtki zattaryn ótkizý deregi boıynsha 47, asa iri kólemdegi esirtki zattaryn saqtaý deregi boıynsha 42 qylmystyq is qozǵalǵan. Zańsyz aınalymnan 520 keli esirtki zattary tárkilengen. Bul týraly esirtki saqtaýmen aınalysqan qylmystyq topty ustaý deregi boıynsha oblystyq ishki ister departamentinde ótken jıynda aıtyldy.
Oblystyq IID Esirtki bıznesine qarsy kúres basqarmasy bastyǵynyń orynbasary, polısııa polkovnıgi Eraly Egemberdıev baspasóz brıfınginde Esirtki bıznesine qarsy kúres basqarmasynyń qyzmetkerleri uıymdasqan qylmysqa qarsy kúres jáne Jergilikti polısııa qyzmetterimen tyǵyz árekettese otyryp, esirtki bıznesiniń aldyn alýda birqatar keshendi sharalar júrgizýde ekenin atap ótti.
Hamıt Esaman,
«Egemen Qazaqstan»
Jambyl oblysy
