Oǵan Ulttyq ekonomıka mınıstri Tımýr Súleımenov qatysyp, ekonomıkalyq ósimniń jańa modeli, bıznesti damytý úshin qabyldanatyn sharalar, saýda qyzmeti men tarıftik saıasattaǵy jańalyqtar týraly aıtyp berdi.
Kezdesýde mınıstr bıyl elimizde kásipkerlikti jappaı damytý baǵdarlamasynyń bastalatynyn, sonyń arqasynda Qazaqstan azamattaryna aýylda nemese qalada óz bıznesi úshin 16 mıllıon teńgege deıin shaǵyn nesıe beriletinin aıtty. Sondaı-aq, ol aldaǵy onjyldyqta jańa ındýstrııalandyrý men damýdyń jańa modelin qalyptastyrý úshin eldiń jańa tehnologııalyq qurylysqa kóshýiniń biryńǵaı strategııasy ázirlenetinin, osy maqsatta «Qazaqstannyń ulttyq tehnologııalyq bastamasy» Qazaqstan-2025 Strategııalyq jospary jasalatynyn atap ótti.
Odan keıin ol elimizdegi memleket-jekemenshik áriptestiginiń damýy týraly áńgimeledi.
– Qabyldanǵan zańdar men júıeli sharalardyń arqasynda memleket-jekemenshik áriptestigi jobalaryn ázirleý men júzege asyrý boıynsha óńirlerdiń belsendiligi artty. Búginde 40 joba boıynsha kelisim jasaldy, onyń ishinde respýblıkalyq mańyzdaǵy 48,9 mlrd teńgeniń 3 MJÁ jobasy bar, – dedi T.Súleımenov.
Onyń aıtýynsha, taǵy da 312 jobanyń tujyrymdamasy ázirlenýde. Memleket-jekemenshik áriptestigi jobalaryn josparlaý resimderi de jeńildetiledi.
Al Qazaqstannyń saýda saıasaty men ıntegrasııalyq úderister týraly mınıstr osy maqsatta Ulttyq eksporttyq strategııa ázirlenip jatqanyn aıtty.
Ol Qazaqstannyń Eýrazııalyq ekonomıkalyq qoǵamdastyqqa qatysýy áriptes eldermen saýda-sattyq kezindegi kedergilerdi joıýǵa, otandyq ónim shyǵarý naryǵyn keńeıtýge jáne sheteldik ınvestısııa tartýǵa qajetti jaǵdaı týǵyzatynyn atap kórsetti. Onyń aıtýynsha, qazirgi kezde Iranmen bolashaqta erkin saýda aımaǵyn qurýǵa ákeletin ýaqytsha kelisim jasaý týraly kelissózder aıasynda EýrAzEQ boıynsha áriptestermen birlesken aýqymdy jumystar júrgizilýde.
Dastan Kenjalın,
«Egemen Qazaqstan»
