Qostanaı oblystyq fılarmonııasynyń beldi ánshisi, oblystyq «Mesenattar klýby» syılyǵynyń laýreaty Gúlnár Úsenova jeke konsertin berdi. Baǵdarlamanyń tek qazaq ánderinen turýy ánshi konsertiniń ereksheligi boldy. Erkeǵalı Rahmadıevtiń shalyqtaǵan «Tań samaly» áninen bastap, Shámshi Qaldaıaqovtyń, Eskendir Hasanǵalıevtiń ánderimen kómkergen ánshi tyńdarmanyn halyq ánderimen de sýsyndatty. Oınaqy aıtylatyn «Maýsymjan», «Aq darıǵa», «Serippeli sem-sem» ánderin zal jaqsy qabyldady. Sonymen qatar, barlyq ıirimderin keltire, naqyshymen shyrqaǵan ataqty «Altyn Altaı» áni Gúlnár ánshiliginiń shyńy ispettes edi.
«Gúlnárdiń shyrqaýyndaǵy barlyq án bir tóbe, «Altyn Altaı» bir tóbe sekildi boldy maǵan. Ony shyrqaǵanda Gúlnárdiń dramalyq soprano daýysynyń barlyq boıaýy erekshe estiledi», – dedi konsertke kelgen tyńdarman Márzııa Esqazına.
Gúlnár konsertinde tek qazaq halyq ánderi men qazaq kompozıtorlarynyń ǵana ánderin shyrqaǵan joq, qazaq operalarynan da arııalar aıtty. «Er Tarǵyn» operasynan Aqjúnistiń, «Aısulý» operasynan Aısulýdyń arııalary Gúlnárdiń oryndaýynda qazaq áıelderiniń operadaǵy beınesin asha túskendeı boldy. Konsert sońynda sóz alǵan E.О́mirzaqov atyndaǵy oblystyq fılarmonııasynyń dırektory Larısa Seroýs Gúlnárǵa raqmet aıta otyryp, onyń shyǵarmashylyǵyna zor tabystar tiledi.
Sonymen qatar, Gúlnárdiń án ónerindegi tynymsyz eńbegin, ózindik erekshe daýysyn kórermen árdaıym kútip otyratynyn jetkizdi.
Názıra Járimbetova,
«Egemen Qazaqstan»
