Bolashaqtyń baıany úshin basyn báıgege tikken batyrlardyń esimi de elge eleýli. Osydan alty jyl buryn Taraz kóshelerinde qyrǵyn salǵan qandyqol qylmyskerdi quryqtaý kezinde qaza tapqan polısııa kapıtany Ǵazız Baıtasovtyń esimi árdaıym el jadynda. Qarashanyń qara sýyǵynda kelip jetken qaraly habar qabyrǵany qaıystyrǵanmen, batyrdyń asqaq rýhy men bekzat bolmysy jurt júreginde jattalyp qaldy.
Qoǵam tynyshtyǵyn kúzetýde qyrshyn ketken bozdaqtyń rýhy kóne Taraz shaharynda taǵy bir sharyqtady. 3 sáýir batyrdyń týǵan kúnine oraı Dańq alańynda mıtıng uıymdastyrylyp, oǵan oblys jáne qala turǵyndary, oblystyq balalar men jasóspirimder «Polısııa akademııasy» ortalyǵynyń kýrsanttary, sondaı-aq «Aıbyn» áskerı-patrıottyq klýbynyń músheleri qatysty. Jınalǵan kópshilik áýeli Halyq qaharmany Ǵazız Baıtasovty bir mınýt únsizdikpen eske alyp, rýhyna taǵzym etti. Sodan keıin Taraz qalasynyń ákimi Rústem Dáýlet, oblystyq ishki ister departamentiniń bastyǵy Tilegen Matkenov jáne Ǵazız Baıtasovtyń jubaıy Gúljamal Tájıeva bastaǵan birqatar azamattar Dańq alańynda ornatylǵan batyrdyń eskertkishine gúl shoqtaryn qoıdy.
О́z sózinde polısııa general-maıory Tilegen Sovetuly Ǵazız Baıtasovtyń erligi árdaıym jas urpaqqa úlgi ekenin, er esiminiń eshqashan umytylmaıtynyn atap ótti. Al batyrdyń jary Gúljamal Tájıeva Ǵazız Baıtasovtyń erligine qurmet kórsetip otyrǵan otyrǵan azamattarǵa alǵysyn bildirdi.
«Ǵazız búgin ortamyzda bolǵanda 46 jasqa tolatyn edi. Biraq onyń jasaǵan erligi ózinen keıingi polısııa qyzmetkerlerine úlgi boldy. Erlik eshqashan umytylmaıdy. Ol ómirimen erte qoshtassa da, Otanyn, halqyn, jerlesterin qorǵady», – dedi Gúljamal Mahambetqyzy.
Aıta keteıik, Taraz qalasynda ornalasqan orta jáne joǵary oqý oryndarynda, jalpy bilim beretin orta mektepterde Halyq qaharmany Ǵazız Baıtasovtyń erligin nasıhattaýǵa arnalǵan «Erlik saǵattary» ótkizilýde. Bul bastama jastardy patrıottyq rýhta tárbıelep, týǵan el tulǵalaryn tereńirek bilýge baýlıdy.
Hamıt Esaman,
«Egemen Qazaqstan»
Jambyl oblysy
