Jemis aǵashtary Tólebı aýdany, Abaı aýylyndaǵy 150 otbasyǵa tegin taratyldy. Bul iske aýdan ákimdigi men jergilikti kásipker, oblystyq máslıhattyń depýtaty Áset Qaıypbekov muryndyq boldy. Sondaı-aq atalǵan aýylda oblys ákiminiń «Shatqal» baǵdarlamasy aıasynda aýmaǵy 1 shaqyrymdy quraıtyn saıǵa aryq tartylyp, aǵash kóshetteri otyrǵyzyldy.
Jalpy, Kemeqalǵan aýyl okrýginde 5 myńǵa tarta turǵyn bar. Negizgi kásibi – mal sharýashylyǵy. Tabıǵaty ásem okrýgtiń klımaty jemis aǵashtaryn otyrǵyzýǵa óte qolaıly. Sondyqtan okrýg turǵyndaryna 10 myń túp jemis aǵashtarynyń kóshetterin demeýshi óz qarjysyna satyp alyp, syıǵa tartty.
«Búgingi jasalynyp otyrǵan shara – Tólebı aýdanynyń damý konsepsııasynda kórsetilgen tarmaqtyń biri. Biz aldaǵy ýaqytta demeýshiler tartý arqyly aýdanymyzdaǵy 14 aýyl okrýgine qarasty 150-ge jýyq eldimekendi kógaldandyrý isimen aınalyspaqshymyz. Ár otbasy aýlasyndaǵy eskirgen tal-daraqtardy alyp tastap, ornyna jańa jemis kóshetterin otyrǵyzýy tıis. Búgingi jemis kóshetteri aldaǵy bir-eki jylda óz jemisin beretin bolady», - dedi Tólebı aýdanynyń ákimi Buqarbaı Parmanov.
Budan bólek, aýdan ákimdigi mal sharýashylyǵymen aınalysqysy keletin azamattardyń nesıe alýyna kómek berý isin qolǵa alypty. Nátıjesinde Abaı aýylynyń turǵyny Dáribaı Tasbolatov 6 paıyzben 3 mln. teńge kredıtke qol jetkizip, 15 jylqy satyp alǵan. Aıyna nebári 17 myń teńge nesıe tóleıdi. 3 balanyń ákesi buǵan deıin jumyssyz júripti. Aldaǵy jospary – mal basyn kóbeıtip, aýyldan kooperatıv qurý.
Aýdan ákimdigi tegin úlestirilgen kóshettiń 300 danasyn Dáribaıdyń aýlasyna da asarlatyp otyrǵyzyp berdi.
«Aýdan ákimdigi men jergilikti kásipker Áset Qaıypbekov inimizge alǵysymyz sheksiz. Aýdan basshylyǵy jeke jobamyzǵa qoldaý bildirip, nesıe alýymyzǵa qol ushyn berse, búgin mine, aýlamyzǵa 300 dana jemis aǵashtaryn otyrǵyzyp jatyr. Endi osy jemis aǵashtarynyń durys ósip jetilýine jaýapty bolyp, jemisin alýǵa tyrysamyz» , - dedi Dáribaı Tasbolatov.
