«1 sáýirde Jaman Sarysý ózenindegi kópirde qar sýy deńgeıiniń kóterilýine baılanysty "Aqsý-Aıýly-Aǵadyr" avtojolynyń 72-73 shaqyrymynda kópirdiń tireýin sý shaıyp ketti. Sonyń saldarynan kópirdiń konstrýksııasy qırap qaldy. Osy kópir boıynsha barlyq kólik túri úshin qozǵalys jabyldy, belgiler qoıyldy. Táýlik boıy jumys isteıtin kezekshiler bar», - dedi kólik jáne avtomobıl joldary basqarmasyndaǵylar.
Qazirgi ýaqytta aınalmaly jolǵa qajetti materıaldar daıyndalyp jatyr. Qozǵalys respýblıkalyq mańyzy bar "Aqshataý-Aǵadyr-Ortaý" aınalmaly joly arqyly júzege asyrylýda.
Qutqarýshylar halyqty qaýipsizdik máselesine nemquraıdy qaramaýǵa shaqyrady. «Ár adam óz ómiri úshin jaýapty. Belgili bir qaǵıdalardy ustansa, kez kelgen jaǵdaıdan saqtanýǵa bolady. Barsha aýyldyqtarǵa aqpan-naýryzda sý tasqyny kezeńinde ózin-ózi qalaı ustaý qajettigi týraly jadynama taratylǵan», dedi TJD baspasóz qyzmeti.
Bir aıta keterligi, sońǵy úsh táýlikte Qaraǵandy oblysynda birneshe tótenshe jaǵdaı boldy. 2 sáýirde Qaraǵandy oblysynda eki aǵaıyndynyń joǵalyp ketkeni jaıly habarlanǵan bolatyn.
Condaı-aq, osyǵan deıin Qaraǵandy oblysynda 14 adam otyrǵan ÝAZdyń ózenge túsip ketkeni habarlanǵan edi. Olardyń ishinde kámeletke tolmaǵan úsh bala bar. 11 adam kólikten óz betinshe shyqqan. Keıinirek súńgýirler eki adamnyń máıitin tapqan. Olardyń kim ekeni ázirge belgisiz. Taǵy bir adamdy izdestirý jumystary júrgizilýde.
Qaraǵandy oblysynyń qutqarýshylary qatty aǵyn sý saldarynan jol jıegine shyǵa almaı qalǵan eki er adamǵa jaǵaǵa shyǵýǵa járdemdesti. «Eki er adam Aqshataý-Pavlodar respýblıkalyq mańyzy bar jol jaǵasynda sýda qaıyqpen kele jatyp, sýdyń aǵysy qatty bolǵandyqtan jaǵaǵa jetý qıyndaı túsedi. Olardy TJD jedel qutqarý jasaǵynyń qyzmetkerleri qutqardy. Olar Kóktenkól kentiniń turǵyndary. Olarǵa medısınalyq kómek qajet bolmady, birden úılerine jetkizildi», - dep habarlady TJD.
