Kezdesý barysynda memleketter basshylary ekijaqty yntymaqtastyqtyń keń aýqymdy máselelerin, sonyń ishinde saıası ózara is-qımyl ornatý, saýda-ekonomıkalyq jáne mádenı-gýmanıtarlyq qarym-qatynas jaıyn talqylady.
– Ekonomıka kez kelgen memlekettiń negizgi tuǵyry bolyp sanalady. Túrli saladaǵy, máselen, kólik-kommýnıkasııa salasyndaǵy ýaǵdalastyqtar elderimiz úshin zor múmkindikterge jol ashady, – dedi Qazaqstan Prezıdenti.
Memleket basshysy birlese qabyldanǵan málimdemede ekijaqty qarym-qatynasty damytýdyń strategııalyq joldary aıqyndalǵanyn atap ótti.
– Biz kún tártibinde turǵan barlyq máseleni talqyladyq. Qol qoıýǵa daıyndalǵan qujattar qarym-qatynasymyzdyń damýynyń jańa kezeńi bolyp sanalady. Memleketterimiz arasyndaǵy taýar aınalymynyń kólemin aıtarlyqtaı arttyrýǵa naqty múmkindikter bar dep esepteımin, – dedi Nursultan Nazarbaev.
Qazaqstan Prezıdenti respýblıkamyzdyń Bakýmen jan-jaqty ózara is-qımyl aıasyn keńeıtýge múddeliligin jáne ol úshin qajetti áleýet bar ekenin aıtty. Bul rette saýda-ekonomıkalyq yntymaqtastyq ekijaqty qarym-qatynastyń lokomotıvi bolyp sanalady.
– Elimizde Qazaqstan azamaty bolyp sanalatyn kóptegen etnıkalyq ázerbaıjandyqtar turyp jatyr. Olar Qazaqstanda kásiporyn ashyp, bıznespen aınalysyp, eki memleket arasyndaǵy ózara dostyq qarym-qatynasty odan ári nyǵaıtýǵa septigin tıgizetin dáneker ispetti, – dedi Memleket basshysy.
Budan bólek, Nursultan Nazarbaev kelissóz barysynda gýmanıtarlyq baılanystar aıasyn keńeıtý máseleleri qaralǵanyna nazar aýdardy.
– Stýdentter almasý, eki eldiń mádenı kúnderin ótkizý máselelerine tıisti deńgeıde nazar aýdarý qajet. Ol mádenı baılanystarymyzdy jańa deńgeıge kóterýge septigin tıgizetin bolady, – dedi Qazaqstan Prezıdenti.
Ázerbaıjan Respýblıkasynyń Prezıdenti Qazaqstannyń BUU Qaýipsizdik Keńesiniń turaqty emes múshesi bolyp saılanýy onyń álemdik arenadaǵy róli moıyndalǵanynyń kórsetkishi jáne Nursultan Nazarbaevtyń jeke bedeliniń arqasy ekenin atap ótti.
– Sizdiń óńirlik qana emes, sonymen birge álemdik aýqymdaǵy bastamalaryńyz zor qurmetke ıe bolyp keledi. Ekijaqty qarym-qatynastyń damýyna kóńilimiz tolady. Búgingi syndarly pikir almasýlar talqylanǵan kóptegen máseleler jónindegi ustanymdarymyzdyń uqsastyǵyn kórsetedi, – dedi I.Álıev.
Sondaı-aq, Ázerbaıjan kóshbasshysy ekijaqty ekonomıkalyq yntymaqtastyqtyń qarqyndy damyp kele jatqanyna nazar aýdardy.
– Biz eki memlekettiń ınvestısııa salasyndaǵy jumysynyń qorytyndysy boıynsha oń nátıjeler bar ekenin kórip otyrmyz. Bul shaǵyn jáne orta bıznes salasynyń damýyna septigin tıgizetin bolady, – dedi Ázerbaıjan Prezıdenti.
