Sodan da bolar, Boxingnewsandviews.com saıty «Sheteldegi aıqastardy Jaqııanovtan artyq biletin adam joq», dep sanaıdy. Atalǵan portal tipti, oǵan «Joldaǵy jaýynger» dep at qoıyp, aıdar taqqan.
Sońǵy jekpe-jegin AQSh-ta ótkizip, óziniń basty armany – WBA tujyrymy boıynsha álemniń sýperchempıony ataǵyna qol jetkizgen bylǵary qolǵap sheberimen arada bolǵan suhbattaǵy áńgime bylaısha órilgen edi...
– Siz boksqa 16 jasyńyzda kelipsiz. Bárin kesh bastaǵannyń kúnniń ózinde osyndaı jetistikke jetýińizdiń syry nede?
– О́zim Soltústik Qazaqstan oblysynyń Jambyl aýdanyna qarasty aýylda dúnıege kelgenmin. Mektepte oqyp júrip kúreske qatystym. Al 1998 jyly Petropavlǵa kóship, úıirmeniń alys bolýyna baılanysty sporttan qol úzip qaldym. Tek 1999 jyldyń sońyna qaraı synyptastarymmen birge boks úıirmesine bara bastadym. Meniń bul áreketime ýaqytsha qyzyǵýshylyq dep qaraǵandar boldy. Áýesqoı boksta kóp júrgen joqpyn. Al kásipqoı boksta belgili belesti baǵyndyrsam, ol eńbektiń arqasy. Eń bastysy, maqsatqa jetý jolynda qorqynyshty jeńe bilý kerek.
– Meniń bilýimshe, áıgili Hattonnyń eń tabysty shákirtisiz ǵoı? Al onymen til tabysý qanshalyqty ońaı?
– Ázirge shákirtteriniń arasynan birinshi bolyp álem chempıony atandym. Onyń qaramaǵynda daryndy jastar óte kóp. Sondyqtan, áli talaı jeńimpaz shyǵatynyna senimdimin. Onyń ústine Rıkkı óte bilikti maman. Kásipqoı bokstyń jilik maıyn shaqqan ǵoı. Kezinde sharshy alańda Mennı Pakıaomen kezdesti. Kostıa Szıýdi utty. Mine, birge jumys istep jatqanymyzǵa tórt jyl boldy. Bir-birimizdi tez uǵynysamyz. Promoýter retinde de onyń myqtylyǵyn moıyndaımyn. Álem chempıony ataǵy úshin jekpe-jekti kez kelgen menedjer uıymdastyra almaıdy.
– Qazir sizdiń álem chempıony degen dardaı ataǵyńyz bar. Endi tanymal boksshylarmen kezdesý múmkindigińiz joǵarylaǵan shyǵar?
– Kásipqoı boks degenimiz – bıznes. Munda bárin aqsha sheshedi. Kimniń usynysy kóńilden shyǵady, sonymen kelissóz jasalady. Sondyqtan, bul taraptardyń kelisimine baılanysty. Kelesi qarsylasymnyń kim bolatynyn bilmeımin. Onymen menedjerler men bapkerler aınalysady.
– Ýorrenmen arada bolǵan jekpe-jek úshin siz 30 myń dollar aldyńyz, qarsylasyńyzǵa jeńilisine qaramastan sizden bes ese kóp buıyrdy...
– Bul aıqasta biz úshin aqsha emes, belbeý mańyzdy boldy. Ýorrenniń komandasy «30 myń dollar beremiz, eger daıyn bolsańdar, kezdesý kúnin belgileımiz» dep usynys jasady. Biz birden kelistik. Kásipqoı boksqa aýysatyndardyń kózdeıtini de negizinen aqsha ǵoı. Sondyqtan jaqsy usynystar bolyp jatsa, qarastyrýǵa daıynbyz. Biraq ol úshin usynys aldymen bapkerlerimniń kóńilinen shyǵýy tıis.
– Siz sekildi Eýropada nemese muhıt asyp AQSh-ta baǵyn synaǵysy keletin jastarymyz bar. Olardy komandańyzǵa tartyp, birge jattyǵý oıda joq pa?
– Hatton óz komandasyna tájirıbeli, birneshe kezdesý ótkizip, ózin dáleldep úlgergen boksshylardy shaqyrady. Naqtyraǵy, sheteldikterge qoıylatyn talap osy. Al aǵylshyn bolsa, onyń topqa kirý múmkindigi joǵary. Ol til biledi, ony jergilikti jankúıerler tez qabyldaıdy. Sonyń ózi jarnama.
– Jalpy, shetelde qazaqstandyq boksshylarǵa degen kózqaras qandaı?
– Buryndary «I am from Kazakhstan» deseń, bastaryn shulǵyp qalatyn «Ol qaı jerde?» degendeı. Qazir birden «Triple G! Good!», deıdi. Gennadıı Golovkındi bári tanıdy, qurmetteıdi. Qýanyp qalasyń, elimizde osyndaı brendtiń baryna.
– Al Golovkınniń deńgeıine jetý úshin sizge ne isteý kerek dep oılaısyz?
– Árkimniń óz joly bar. Men bireýge qarap, soǵan uqsaýǵa tyryspaımyn. Osy dárejege jetkenime qýanyshtymyn. Dál qazir maǵan buıyrtqan jolmen júrip kele jatyrmyn.
– Astanada jekpe-jek ótkizgińiz keletindigin aıtypsyz. Bul týraly usynystar bar ma?
– Usynystar túsken joq, ózimniń qalaýym ǵoı. EHRO qarsańynda otandastarym aldynda kezdesý ótkizsem degen arman ázirge.
– Sizdiń sporttyq karerańyzdan bólek SQO-da jattyqtyrýshy bolyp ta qyzmet etesiz. Teriskeı ólkedegi bokstyń damýyna qandaı baǵa berer edińiz?
– 2006 jyly oqýdy támamdaǵan soń bir jyl jumys istep áskerge kettim de, kelgen soń jattyqtyrýshylyq qyzmetimdi jalǵastyrdym. 91 keliden joǵary salmaqta bir shákirtim el birinshiliginde úshinshi oryn aldy, taǵy bir shákirtim kadetter arasynda júldegerler qatarynan kórindi. Odan bólek Azııa chempıonatynyń fınalısi Azat Elýbaev degen daryndy jigit bar. Jalpy alǵanda, boksqa qyzyǵýshylyq artqan.
– Sizdi segiz lıtrge deıin sý ishedi deıdi. Nelikten? Jalpy, salmaqty qalypta ustap turý qanshalyqty qıyn?
– Tym bosańsyp ketpeýge tyrysamyn, qansha salmaq qýa alatynymdy bilemin. Daıyndyq kezinde sýdy kóp ishetinim ras. Bulshyq et sozylmaly bolady. Aǵza qurǵaqshylyqty sezinbes úshin de sý qajet. Aldymen 2 lıtrden bastap daıyndyqtyń orta tusynda 8 lıtrge deıin jetkizemin. Al tarazyǵa tartylýǵa bir apta qalǵanda kúnara 2 lıtrge azaıta bastaısyń. Salmaq ólsheıtin kúni múlde sý ishpeımin, tek bári oıdaǵydaı ótken soń ǵana suıyqtyqtyń ornyn toltyryp, tamaqtanyp alamyn.
– Endigi armanyńyz qandaı?
– Eki balam bar – bir ul, bir qyz. Ekeýi de áli kishkentaı. Solarǵa jaqsy tárbıe bersek, aman-esen jetildirsek dep armandaımyn. Elimizge syıly azamat bolyp ósse deımin. Tileıtinim osy.
– Áńgimeńizge rahmet.
Áńgimelesken
Mádına Asylbek,
jýrnalıst
ASTANA
