Demalys kúnderi dárigerlik kómek qalaı kórsetiledi?

− Jańa jyl aldynda oblys­taǵy eń iri aýrýhananyń dári­gerin shaqyryp alyp, sóılestim, − deıdi D.Ahmetov. − Sender nege úsh-tórt kún boıy halyqty qabylda­maı­syńdar? «Mereke ǵoı, Danıal Ken­jetaıuly», deıdi álgi bas dári­ger arqany keńge salyp. Sonda 31 jeltoqsanda operasııa jasatqan syrqat, qalǵan tórt kún boıy dárigerlerdiń qaraýynda bolmaýy kerek pe?! Sol sııaqty 8 naýryzda  О́skemendegi Ońaltý ortalyǵynda boldym. Emhanada  kezekshi dárigerden basqa  jan kórinbeıdi. «Nege eshkim joq?» degen suraǵyma: «Mereke», dep taq etip jaýap berdi. Osy jaǵ­daı­dy  ózge de aýrýhanalardan kór­dim. Konstıtýsııanyń 29-baby bo­ıynsha el azamattary densaý­lyqtaryn emdetýge quqyly. Al demalys jáne mereke kúnderi dárigerler jumysqa shyqpasyn degen moratorııdi kim shyǵaryp otyr? Medısına mekemeleri oblystyń bıýdjetinen halyq úshin qajetinshe qarjylandyrylady. Bul qalaı?

Oblys basshysynyń osy eskertpesinen keıin О́skemen men Semeı qalalaryndaǵy iri emhanalardyń jumystary tek­serildi. «Nur Otan» partııa­synyń jergilikti fılıaldary teksergen kezde belgili bol­ǵandaı, dárigerler mereke, dema­lys kúnderi halyqqa em-dom qyzmetterin kórsetýden bas tartady eken. Bul − respýb­lıkanyń biraz óńirlerine tán kórinis. Tipti,  der kezinde kómek kórsetilmegendikten adam ómi­rine qaýip tóngen jaǵdaılar kez­des­ken. Dárigerler sózi «qınalyp bara jatsańdar, «jedel járdem» shaqyryńdar», degenge saıatyn kórinedi.

Árıne, meıram kúnderi adam­dar demalýy kerek. Biraq, dema­lys kúnderi eńbek etken dári­gerlerge jalaqy tóleý kerektigi jóninde de zańnama bar ǵoı, deıdi oblys basshysy.

Qatań tapsyrma Semeıge de jetti. Qala ákiminiń orynba­sa­ry Nadejda Sharova, qalalyq qoǵamdyq keńes jetekshisiniń orynbasary Janna Jıbraeva Ulystyń uly kúnindegi demalys kún­derinde  qaladaǵy densaý­lyq saqtaý mekemeleriniń qyz­metin tekserýden ótkizdi.  Em­ha­nalardyń aldynda jumys kestesiniń ornyna qaptaǵan qoqys, shań basqan ústelder tek­serý tobyn qarsy alypty. Ob­lys ákimi dárigerler demalys kún­deri kem degende saǵat  9.00-den túski 13.00-ge deıin qyz­met kórsetýi kerek degen edi. Biraq, emhanalarda adam joq. Qada­ǵalaýshylar toby eń aldy­men, qalanyń sol jaǵalaýynda orna­lasqan  №19 emhanany tekserdi. Em-shara bólmesinde bir kezekshi dáriger ǵana otyr eken.

Mekemege qansha halyq qaraıdy? Qansha zeınetker, jumys isteýshi, eresekter qaýy­my tirkelimde tur? Mindetti medı­sı­nalyq saqtandyrý júıe­sin engizý máselesi halyqqa qa­laı tú­sin­dirilip jatyr? – dedi N.Sharova.

Biraq, jaýap bergen adam joq. Árıne, barlyq mekeme bir­deı emes. «Okean» aýdanyndaǵy aralas úlgidegi №2 emhanada jaǵ­­daı múlde basqasha. Bul me­ke­mede mereke kúnderi de dári­­gerler jumys isteıdi. Bas dári­ger oryn­basarynyń aıtýyn­­sha, halyq tıisti dárigerleriniń qabyldaý kes­tesin jatqa biledi jáne al­dyn ala jazylyp qoıady.  Mere­ke kúnderi dárigerlerdiń or­nyn ke­zekshi top almastyryp otyrady.

Aıta ketelik, Shyǵys óńirinde elimizdiń basqa oblystaryna qaraǵanda densaýlyq saqtaý salasyna bólinetin qarjy kólemi aýqymdy. Al turǵyndar tıesili medısınalyq qyzmetti alýda qol­dan jasalǵan kedergilerdiń bolmaýyn qalaıdy.

Raýshan NUǴMANBEKOVA

SEMEI