Ulttyq stýdııa túsirilimniń barlyǵy derlik Mańǵystaý oblysynda ótetindigin málimdep otyr. Fılmde Qaraqııa oıysy, Ústirt shoqysy jáne Kaspıı teńizi kórinis tabady. Túsirilimder úshin Aqtaý qalasyna jaqyn jerdegi Qanǵa aýylynda dekorasııalar turǵyzylyp, eldi meken faktýralandy.
Psıhologııalyq shıeleniske toly dramalyq kartınadaǵy basty rólderge Asylhan Tólepov pen Aldabek Shalbaev bekitilgen. Sondaı-aq, fılmge Muhamedjan Myrzakıev, Dáýlet Ábish, Qanatbek Qurymbaev, Maqsat Sábıtov, Azamat Sharǵyn, Zýhra Saıpı jáne basqalar túsetin bolady.
Rejısser Ábish Kekilbaevtyń úzdik týyndylarynyń biri «Shyńyraýdy» ekrandaý asa jaýapkershilikti talap etetindigin aıtady.
– Kóptegen otandyq kınematografıster Ábish Kekilbaevtyń povesi boıynsha fılm qoıýdy jáne ekrandaýdy armandady. Alaıda, áli kúnge deıin povest ekran tilinde sóılegen emes. Ssenarııdi tórt jyl buryn jazyp, túzetýlerdi kúni búginge deıin engizip otyrdym. Qazir meniń bar qalaýym – Ábish Kekilbaevtyń povesi deńgeıindegi fılm túsirý. Biz lokasııa men natýra tańdaýda kóp jumys atqardyq. Barlyq akterler bekitildi. Bir-eki kúnde Mańǵystaý oblysyna túsirilimderdi bastaýǵa jolǵa shyǵamyz, – deıdi rejısser Sh.Aımanov atyndaǵy «Qazaqfılm» AQ Sarapshylyq keńesinde.
– Halyqty sýmen qamtamasyz etip rızashylyǵyna bólenýdi maqsat etýmen bastalǵan jumystyń sońy qyzǵanyshqa aınalady. Al básekede shek bolmaıdy. Sheksizdikke umtylý tylsym kúshpen taıtalasqanmen birdeı. Oǵan adamnyń aqyly da, kúshi de jetpeıdi. Eńseptiń qasireti de osynda. Rejısser retinde maǵan Eńseptiń jan-dúnıesin kórsetý mańyzdy. Prozanyń tilinde jaqsy qoldanylǵan tásil kınematografııada utymdy bolmaı, tipti mańyzyn bere almaı qalady. Sondyqtan da fılmge poveste joq keıbir ózgerister engizdim. Jalpy, povestiń sıýjettik jelisin, fabýlasyn saqtadym, – deıdi Jańabek Jetirýov.
Kartınany shyǵarma deńgeıinde túsirýdi maqsat tutqan rejısser tek kıno tilimen baıandap qoımaı, óz tarapynan tyń sheshimder jasaıtynyn aıtýda.
Fılm Mádenıet jáne sport mınıstrliginiń tapsyrysy boıynsha túsirilýde.
Aınash ESALI,
«Egemen Qazaqstan»
ALMATY
