Dál qazir jumyr jerde Saıyn aǵa joq degenge sene alar emespin, senbeımin de! Bir adam máńgilik jasasa, osy Saıyn aǵa jasaıtyn shyǵar dep júretinbiz, men bastaǵan shákirtteri – Beısen, Amangeldi, Nurǵazy, Álibek, taǵy basqa tolyp jatqan ul-qyzdar...
Kisiligi qandaı edi Saıyn aǵanyń?! Úlkenge kishi, kishige odan da kishi bola alýy tutas bir mektep edi-aý. «Qarapaıymdylyqtyń akademıgi» deýim Saıyn aǵanyń sol uly qasıetine bergen baǵam edi. Jan shýaǵy qandaı qýatty, qandaı mol edi! Aldyna barǵan janǵa tókken meıiriminen kóz túgil oı jetpeıtin sonaý alystaǵy Soltústik muzdy muhıttyń muzdary erip jatýshy edi-aý?!
Sport jýrnalıstıkasyndaǵy ómiri tutas bir oqýlyq edi. Sonaý 1959 jyly qazaq eliniń tarıhynda ashylǵan tuńǵysh «Sport» gazetiniń alǵashqy sanyn óz qolymen shyǵaryp, alaqanynda ustap turdy, degennen artyq qandaı tarıhı adam bolýy kerek bizdiń qoǵamǵa?! Jáne sol gazetten esh jaqqa taban aýdarmaı 50 jyldaı (!) qyzmet isteýiniń ózi erlik emeı nemene?! Jáne sportty bilýi, túsinýi, sezinýi, taldaýy, qorytyndylaýy ǵajap edi ǵoı. О́z basym 15 jyl birge qyzmet istegende Saıyn aǵadan surap alǵan aqparattarym atan túıege júk bolar edi búgin. Aldymyzdan talaı jas jýrnalıster ótti, solardyń sporttyń bir qupııasyn surap alý úshin Saıyn aǵanyń aldyna baryp kezekte turǵanyn talaı kórdim. Jáne suraǵyna jaýap almaǵan bireýi bolǵan emes – Saıyn aǵa eshkimniń shelegin bos qaıtarmaıtyn. Sport jýrnalıstıkasyndaǵy ǵajap ómirbaıanymen ataqty sport jazýshysy Seıdahmet Berdiqulovtyń «Muńaıyp oıanǵan qala» povesine «Uzyntura Saıyn» degen atpen keıipker bolǵan bul jannyń esimi qazaq sport jýrnalıstıkasynda máńgi óshpesteı bop qalǵanyna eshkimniń daýy joq.
Boıy eki metrge taıaý, aq júzdi, sulý músindi, sport jarysy bolǵan jerdiń koroli Saıyn aǵa jas kezinde talaı sulýlardy telmirtken-aq shyǵar. О́zi jaqsy qartaıdy. О́le-ólgenshe tutas planetaǵa jylý bererdeı meıirimdi kúlkisinen aıyrylǵan joq. «Meniń Nesipjanym», «Meniń Beısenjanym», «Meniń Amanjanym» degen kezde janynda tursaq ta, alysta júrsek te, mundaı sheksiz meıirimnen kún kózi tike túsken balmuzdaqtaı erip turatynbyz. О́ziniń dostary Júsip aǵa Hısymovpen, Sultanǵalı aǵa Qarataevpen, Anatolıı aǵa Pıatıbratovpen ázil-qaljyńdaryn jalaý etip, birge júrgen kezderi qandaı ǵajap sabaq edi bizderge!
Endi búgin sol júzin shań basýǵa qımaıtyn Aǵamyzdy, Ustazymyzdy qara jer basqan jandar ishinde joq degenge qalaı senemin, qalaı kónemin! Jalǵan! Jalǵan!.. Dúnıe jalǵan! Al Saıyn aǵa Súleımenuly Tursynov máńgi! Men úshin máńgi, ózge de shákirtteri úshin máńgi! Ol jandy jaryq dúnıe syıǵyzbasa, men óz júregimnen oryn berdim! Qalǵan shákirtteri de solaı eterine esh kúmánim joq! Hosh, qarapaıymdylyqtyń akademıgi, sport jýrnalıstıkasynyń Alataýy, uly ustaz Saıyn aǵa Tursynov!
Nesip JÚNISBAEV,
ardager jýrnalıst
ASTANA
