Aıdyn ıeleri «á» degennen alǵa umtylyp, nebári 30 sekýndtyń ishinde esep ashyp úlgerdi. Talǵat Jaılaýov pen Maksım Belıaev jetkizgen shaıbany Ivan Ivanov qaqpaǵa dál baǵyttady. Shyǵysqazaqstandyqtardyń tegeýrindi shabýylynan abdyrap qalǵan qonaqtar osydan keıin barynsha saq oınaýǵa tyrysyp baqty. Nátıjesinde, «Rýbın» sapynan Dmıtrıı Klopov 14-mınýtta tarazy basyn teńestirip ketti. Bul tusta olardyń bir hokkeıshisi artyq bolǵanyn aıta ketken jón. Degenmen, arada birer mınýt óter-ótpeste óskemendikter taǵy da alǵa shyqty. Kezdesýdiń 16-mınýtynda Evgenıı Belýhın mergendigimen kózge tústi.
Ekinshi kezeńniń bastapqy mınýttary da osy baǵytta órbigen edi. Jerlesterimiz basymdyqty arttyrý úshin qarsylastaryn qyspaqqa alýmen boldy. Biraq, 29-mınýttan bastap aıdyndaǵy jaǵdaı kúrt ózgerip saldy. Qonaqtar sapynan Vıtalıı Kamenov esepti 2:2-ge jetkizdi. Aıdarynan jel esken reseılikter ekinshi kezeńniń sońyna deıin «Torpedony» eki ret qapy qaldyrdy. Matchtyń 31-mınýtynda Aleksandr Akmaldınov qaqpa artyndaǵy shamdy taǵy bir márte jarq etkizse, 38-mınýtta Dmıtrıı Klopov dýbl ıesi atanyp, oıyndaǵy sońǵy núkteni qoıdy.
Kezdesýdiń sońǵy bóliginde jerlesterimiz jaǵdaıdy túzeý úshin aıanyp qalmady. Ivan Ivanov, Maık Dalhıýzen syndy hokkeıshilerdiń gol salatyn múmkindikteri bolǵan edi. Biraq olar kózdegen maqsattaryna jete almady. Sóıtip, match 4:2 esebimen «Rýbınniń» paıdasyna sheshildi.
Sonymen, serııadaǵy jalpy esep 3:2 – «Torpedo» alda. Qos komanda arasyndaǵy altynshy kezdesý erteń Túmende ótedi. Eger, jerlesterimiz jeńiske jeter bolsa, Bratına kýbogynyń fınalyna shyǵady. Al jeńilip qalǵan jaǵdaıda sheshýshi match О́skemende ótedi.
Aıan ÁBDÝÁLI,
«Egemen Qazaqstan»
