Basqosýǵa Májilis depýtattary, tanymal saıasattanýshylar, azamattyq sektor ókilderi, áleýmettik jelilerdi belsendi paıdalanýshylar qatysty. Sharany uıymdastyrýshylardyń aıtýynsha, Kásipodaqtar federasııasy ortalyqta jáne jergilikti jerlerde azamattyq sektor, áleýmettik jeliler, qoǵamdyq pikirdiń belsendi kóshbasshylaryn tartý arqyly «medıatorlar pýlyn» quryp, áleýmettik medıasııa jumystarynyń mańyzdylyǵyn arttyrýdy josparlaýda.
Jıyndy ashyp, sóz sóılegen federasııa tóraǵasy Ábilǵazy Qusaıynov Memleket basshysy Nursultan Nazarbaevtyń Qazaqstan halqyna arnaǵan Joldaýynda adamı kapıtaldy damytý negizgi basymdyqtardyń biri retinde ataǵandyǵyn eske salyp ótti. «Bul proseste áleýmettik medıasııa tetikterin engizý qadamdary mańyzdy ról atqarady. Meniń oıymsha, atalǵan máseleni qoǵam arasynda salmaǵy bar, óz oıyn ashyq aıta alatyn azamattarmen kelise otyryp sheshken ońtaıly bolady», dedi ol.
Sharaǵa qatysýshylar eldegi adamı kapıtaldy damytý men áleýmettik turaqtylyqty saqtaý baǵytynda birqatar naqty sharalardy usyndy.
Jańa qurylǵan keńestiń basshylyǵyna belgili saıasattanýshy Erlan Saırov saılandy.
Ashat RAIQUL,
«Egemen Qazaqstan»
