A.Grınniń «Alqyzyl jelken» povesin zamanǵa laıyqtap, jańashyl keıipkerler álemimen toǵystyrǵan dramatýrg – Pavel Morozov. Búginde pesa sheshen, balqar, qazaq, ýkraın tilderine aýdarylǵan.
«Assol» – júregin qolyna ustap júgirip júrgen armanshyl boıjetken týraly bir úzik syr. Assol júrgen jerde dala án salady, jal-jal teńiz tolqyndary qanatyn sermeı bıleı jóneledi, aınala shýaqqa bólenedi. О́zgelerge uqsamaıtyndyǵy úshin-aq jazyqty bolǵan jas qyzdy teńiz jaǵasyndaǵy Kapern aýylyndaǵylar jyndyǵa balap, shetqaqpaılap, qıt etse «baqyt seniń ne teńiń» dep kúletin edi. Kúnderdiń bir kúninde teńizdiń arǵy betinen alqyzyl jelkeni jelbirep jetken kapıtan Greı sypsyń sóz jaılaǵan aýyldaǵy sol bir arýdy izdep kelgende, turǵyndardyń kózi tas tóbesine shyqty. Baqytsyzdar entelegen qoǵamda baqytty bolý múmkin be? Súıispenshilikten jurdaı otbasynda súıkimdi bala óse me? Spektakl mine osyndaı suraqtarǵa jaýap izdeıdi. Qoıylym – romantıkalyq, lırıkalyq sıpatymen jáne keıipkerler arasyndaǵy qarama-qaıshylyqqa toly kórinistermen erekshelenedi.
Spektakl dekorasııasy bastan-aıaq ózgerissiz qalyp, oqıǵa ótetin oryn aýysarda az-maz býtaforııalyq detaldarmen tolyqtyrylady. Kórermen nazaryna usynylǵan lırıkalyq dıalogtar men mýzykalyq traktovkasy qoıylymnan alatyn estetıkalyq jaǵymdy áserdi eseleı túskendeı. Utymdy mızanssenalar kesh boıy úsh-aq oryndyq pen jaryq quraldarynyń kómegi arqyly áserli ári kórneki jasalǵan.
«Mundaı tájirıbelik spektakl Qazaqstanda alǵash ret bolyp otyr. Teatr ujymymen birlesip jumys isteý qıynǵa soqqan joq. Buǵan deıin mundaı tájirıbelik qoıylymdardy Reseıde 3-4 kúnde jasap shyqqanbyz», deıdi rejısser S. Potapov.
Bas partııa Assoldi Marııa Bandysheva somdasa, Assoldiń ákesi Longren rólin talantty akter Denıs Annıkov alyp shyqty. Sıqyrshy Egl rólinde Ivan Anopchenko, jas kapıtan Greıdiń rólinde Danıla Homko oınady.
Aıa О́MIRTAI,
«Egemen Qazaqstan»
