«Amerıkada jurt Golovkındi beıne bir «qubyjyq» sekildi kóredi. Olardyń pikirinshe, GGG jekpe-jekte bárin sulata berýi tıis. Tek AQSh-ta ǵana emes búkil álemde sondaı túsinik qalyptasqan. Gena bul túsinikten qutylýdyń jolyn qarastyrdy. Osyǵan baılanysty Djeıkobspen 12 raýnd judyryqtasty. Boıyndaǵy bar kúshin bul jekpe-jekte kórsetkisi kelmedi. Sebebi, Sonders, Alvares sekildi qarsylastaryn shoshytyp alýy múmkin. Denıel arqyly óziniń «qubyjyq» emes qarapaıym boksshy ekenin kórsetkisi kelgendeı.
Ony Gennadııdiń qoldanǵan tásili dep oılaýǵa bolady. Qarsylastarynyń ózine degen pikirin ózgertip, ıaǵnı aldarqatyp, jekpe-jekter uıymdastyrmaq. Bul birinshiden. Al ekinshiden, ol qansha jasta? 1982 jyly dúnıege keldi, qazir 34 jasta. Birer kúnnen keıin 35-ke tolady. Biz jasara túspeımiz ǵoı. Ýaqyt óte kele jyldamdyǵymyz da, soqqylarymyzdyń kúshi de báseńdeıdi. Ár nárseniń óz ýaqyty bar. GGG boksshy retindegi karerasyn aıaqtaý týraly oılana berýi kerek. Kishi Floıd Meıýezer jeńilmegen boksshy retinde rıngten ketken sııaqty. Bul kez kelgen adamnyń bedelin arttyra túsedi», – dedi Ermahan Ybraıymov.
Olımpıada chempıony sondaı-aq, amerıkalyq Denıel Djeıkobs jaıly da oı bólisti.
«Boıy uzyn, jyldam. Qas qaǵym sátte ońǵa da solǵa da qashyp, soqqylardan sytylyp shyǵyp ketedi. Bolashaǵy zor. Odan úlken úmit kútýge bolady», – dedi Olımpıada chempıony.
Aıta keteıik, Gennadıı Golovkın 18 sáýir kúni Nıý-Iorktegi Madison Square Garden arenasynda amerıkalyq Denıel Djeıkobspen kúsh synasyp, tóreshilerdiń sheshimi boıynsha jeńiske jetken bolatyn. Qazaqstandyq boksshy karerasynda alǵash ret 12 raýndty tolyq ótkizdi. Kezdesýden soń Djeıkobs revansh jekpe-jek uıymdastyrǵysy keletinin málimdedi. Al Genadıı oǵan qarsy emestigin aıtty.
WBC, WBA (Super), IBF jáne IBO nusqalary boıynsha álem chempıony Gennadıı Golovkın sharshy alańǵa 10 maýsym kúni shyǵady dep kútilýde. Onyń qarsylasy orta salmaqtaǵy brıtan boksshysy WBO belbeýiniń ıegeri Bıllı Djo Sonders bolýy múmkin. Qos tarap ázirge jekpe-jek jóninde kelisimshartqa qol qoımady. GGG orta salmaqtaǵy barlyq belbeýdiń basyn qosyp, absolıýtti chempıon bolýdy armandaıtynyn birneshe ret málimdedi. Al jalǵyz qalǵan belbeý dál osy brıtan boksshysynyń ıeliginde. Qos tarap ortaq kelisimge keler bolsa, boks keshi Astanada EXPO-2017 kórmesi kezinde ótýi múmkin.
Málimetter boıynsha Golovkın osy kúzde meksıkalyq Saýl «Kanelo» Alvarespen de qolǵap túıistiredi.
Aıta keteıik, «Kanelo» 2015 jyldyń qarasha aıynda pýertorıkalyq Mıgel Kottony tóreshilerdiń sheshimimen jeńgennen keıin WBC nusqasy boıynsha álem chempıony atanǵan. 7 mamyrda Amır Handy jeńip, tıtýlyn qorǵaǵannan keıin zalda otyrǵan Gennadıı Golovkındi ashyq túrde kúsh synasýǵa shaqyrdy. Sondaı-aq, uıym ony WBC-diń turaqty chempıony Golovkınmen judyryqtasýdy mindettedi. Eki jaq ótken jyldyń 24 mamyryna deıin boks keshi jóninde ortaq ymyraǵa kelýi tıis bolatyn. Biraq 19 mamyr kúni meksıkalyq sportshy WBC belbeýin qaldyryp, salmaǵyn aýystyratynyn málimdedi.
«Kareramda munan da úlken kezdesýler ótkizdim. Ondaı qadamǵa ekiniń biri bara bermeıdi. Osyǵan deıin eshkimnen qoryqqan emespin. Biraq meni arnaıy ýaqyt belgilep sharshy alańǵa eshkim de shyǵara almaıdy», – dedi Alvares.
Bul aıqas 2016 jyldyń qyrkúıeginde ótýi tıis bolatyn. Biraq meksıkalyqpen kelisimge kele almaǵannan keıin Golovkın 11 qyrkúıekte Kell Brýkpen qolǵap túıistirdi.
Daıyndaǵan: Aıan ÁBDÝÁLI, «Egemen Qazaqstan»
