Aıta keterligi Kanadada ótken boks keshinde basty aıqas Batyr Júkembaev pen meksıkalyq Kosme Rıvera arasynda ótti.
«Osyǵan deıin Artýr Beterbıevke de tıtýldy aıqas uıymdastyrǵanbyz. Menedjer retinde qaramaǵymdaǵy sportshym boks keshindegi basty kezdesýdi buǵan deıin de ótkizgen edik. Biraq, Batyrdyń jeńisi men úshin Artýrdikinen áldeqaıda mańyzdy boldy.
Batyr – erekshe adam. Ony boksshy retinde qatty syılaımyn. Abylaıhan ekeýine ózimniń balam sekildi qaraımyn. Olardyń kezekti jeńisine qatty qýanamyn. Qaramaǵyńdaǵy sportshyń jeńiske jetkendegi sezim múldem bólek. Bul olardyń tynbaı jattyqqanynyń arqasy. Batyr chempıondyq belbeýimen jaqynda Qazaqstanǵa barady», – dedi menedjer.
Anna Reva Batyr Júkembaevtyń aldaǵy jospary týraly da oı bólisti. Aıtýynsha, boksshy jaqyn kúnderi Qazaqstanǵa qaıtyp oralady.
«Endi ol demalyp, oıyn basqa nársege bólgeni jón. Aldaǵy kezdesýlerine tyń kúshpen kelýi qajet. Chempıondyq belbeýdi psıhologııalyq turǵyda jeńý óte qıyn. Mundaıǵa boksshy árdaıym daıyn bolǵany jón. Jaqynda ol óz eline jol tartady.
Bul Júkembaevtyń kásipqoı bokstaǵy alǵashqy qadamy ǵana. Onyń alar asýy áli alda. Meniń bul pikirimdi boksshy Vasılıı Jırov ta qostady. Ol qazaqstandyq boksshylardyń sharshy alańdaǵy joly endi bastalǵanyn, bul jeńisteri jańa belesterdi baǵyndyrýyna serpilis berýi kerektigin aıtty. Aldaǵy ýaqytta Batyrǵa da, Abylaıhanǵa da tıtýldy jekpe-jek uıymdastyrýdy josparlap júrmiz», – dedi Anna Reva.
Osyǵan deıin Astanada EXPO-2017 kórmesi kezinde boks keshi uıymdastyrylatyny habarlanǵan. Bul keshte Batyr Júkembaev pen Abylaıhan Qusaıynov qatysýy múmkin be? Qos boksshynyń menedjeri ázirge usynys túspegenin aıtty.
«Bizge bul týraly ázirge usynys kelmedi. Árıne, ondaı múmkindik bolsa, boksshylarymyz qatysýy úshin qolymyzdan kelgenniń bárin jasar edik. Batyr da, Abylaıhan da buǵan qýana-qýana kelisetini anyq. О́z elinde, óz jankúıerleriniń aldynda judyryqtasqanǵa ne jetsin! Biraq onyń bári aldyn ala talqylanyp baryp sheshilýi tıis. Sebebi, bizge boksshylarymyzdyń daıyn kúıde barǵany mańyzdyraq», – dedi ol.
Osyǵan deıin qos boksshynyń Davıd Leme men Kertıs Stıvens arasyndaǵy jekpe-jektiń anderkartynda judyryqtasatyny habarlanǵan edi. Biraq menedjerdiń aıtýynsha aldarynda eki tańdaý turypty. Biri – chempıondyq kezdesý ótkizý, ekinshisi – Leme-Stıvens keshinde sharshy alańǵa shyǵý.
«Komandamen osy máseleni talqylaı kele Monrealda jekpe-jek uıymdastyrýdy jón kórdik», – dedi Anna Reva.
Menedjerdiń aıtýynsha, jigitter álemniń kez kelgen jerinde sharshy alańǵa shyǵýǵa daıyn. Basty maqsat – kareralary órge júrip, deńgeılerin arttyrý.
«Basty maqsatymyz – boksshylarymyzdyń jıi kezdesý ótkizýi. Biz kez kelgen memlekette judyryqtasýǵa daıynbyz. Biraq jigitter bir qalypta turyp qalmaı, árbir jekpe-jeginde deńgeılerin arttyrýy tıis. Bizdi alda úlken jumystar kútip tur. Qaıtalap aıtaıyn, biz AQSh-ta da, Kanada da, Anglııada da, Qazaqstanda da bokstasýǵa daıynbyz. Árıne, bastysy sportshylarymyzdyń karerasy durys baǵytta órbise bolǵany», – dedi ol.
Abylaıhan da, Batyr da birneshe jekpe-jegin Kanadada ótkizdi. Bul elde olar qanshalyqty tanymaldylyqqa ıe?
«Qazir Kanada halqy boksshylarymyzdy qatty syılaıdy. Olardy syılamaý múmkin be, júzderinen nur tógilip tur ǵoı! Ata-analaryna sheksiz alǵysymdy bildiremin. Sebebi, olar naǵyz azamattardy tárbılep ósirdi. Sportshylarymyz kanadalyqtarǵa da úlgi bolyp júr. Naǵyz boksshylar dál osyndaı sıpatqa bolýy kerek», – dedi qazaqstandyq boksshylardyń menedjeri.
Aıta keteıik, 7 sáýir kúni Kanadada Abylaıhan Qusaıynov meksıkalyq Krıstıan Arrasolmen kúsh synasyp, ekinshi raýndta sulatyp túsirdi. О́z kezeginde Batyr Júkembaev ta meksıkalyq boksshy Kosme Rıverany jetinshi raýndta tehnıkalyq nokaýtpen jeńip, IBO International belbeýine ıe boldy.
Daıyndaǵan Aıan Ábdýálı, «Egemen Qazaqstan»
