«Jobanyń arqasynda stansalar men olarǵa irgeles jatqan eldi mekenderdiń halqy aýrýdyń aldyn alý úshin medısınalyq tekserýden ótedi, qajetti alǵashqy kómek, kásibı konsýltasııa jáne ári qaraı emdelý úshin jaqyn ornalasqan medısınalyq ortalyqtarǵa joldamalar alady. Budan buryn Elbasy N.Nazarbaev medısınalyq poıyzdardyń jumysyn joǵary baǵalap, kóliktik medısınalyq qyzmet kórsetýdiń ózektiligin basa atap ótken bolatyn. Qazaqstannyń ońtústik jáne batys óńirleriniń halqy 2017 jylǵy 18 sáýirden bastap 2017 jylǵy 20 jeltoqsan aralyǵynda «Densaýlyq» poıyzynyń júrip ótken joly boıynsha joǵary biliktilikti medısınalyq kómek ala alady. «Salamatty Qazaqstan» medısınalyq poıyzy Qaraǵandy qalasynan jolǵa shyǵady. 2017 jylǵy 11 sáýir men 6 qarasha aralyǵynda elimizdiń ortalyq, soltústik, shyǵys óńirleriniń qalalary men aýyldaryna barady. Dárigerler brıgadasynyń quramynda terapevt, pedıatr, nevropatolog, okýlıst, lor, gınekolog, hırýrg, ýrolog, mammolog, stomatolog sııaqty negizgi mamandar bar. Medısınalyq poıyz qyzmetterin Qazaqstannyń shalǵaıdaǵy eldi mekenderiniń medısınalyq kómekke muqtaj turǵyndary, temir jol qyzmetkerleri men zeınetkerler jáne olardyń otbasy músheleri paıdalanýǵa múmkindikteri bar», dedi «Apattyq medısına temir jol gospıtali» AQ basqarma tóraǵasy Ǵabylnur Ábdilmanov.
Sonymen qatar, «QTJ» UK» AQ «Áleýmettik jobalar qory» ujymdyq qorynyń dırektory Erbol Keńgirbaev medısınalyq poıyzdar jumysyn uıymdastyrý barysyna toqtaldy.
«Ujymdyq qor poıyzdardyń qozǵalysyn, kútimi men jóndelýin, jabdyqtar men qyzmetshileriniń kúzetilýin uıymdastyrady, dárigerler men poıyz brıgadalaryn tamaqpen qamtamasyz etedi. Tótenshe jaǵdaılar komıteti dárigerler men jabdyqtar qyzmetine jaýapty. Poıyzdardyń qozǵalys kestesi azamattardyń ótinimi men memlekettik organdar suraýlary negizinde shalǵaıdaǵy stansalarda medısınalyq pýnktterdiń bolmaýyn eskere otyryp jasalady. Sondaı-aq, qaı oblystarda jáne qansha ýaqytta bolǵanyna taldaý júrgizedi. Ár medısınalyq poıyz kópbeıindi mamandandyrylǵan konsýltatıvtik-dıagnostıkalyq kómek kórsetý úshin arnaıy jabdyqtalǵan, medısınalyq qyzmetkerlerdiń turýyna arnalǵan segiz vagonnan turady. Medısınalyq qyzmetkerler men poıyz brıgadasyna arnalǵan eki vagon-kýpede aýa baptaǵyshtar, teledıdarlar, tońazytqyshtar, bıo-dárethanalar men kir jýý orny ornatylǵan. Sondaı-aq, vagon-meıramhana men vagon-dızeldi generatory bar. Onyń kúshi tótenshe jaǵdaı kezinde shaǵyn eldi mekenderge jaryq berýge jetkilikti. Qalǵan tórt vagon halyqty qabyldaýǵa jáne medısınalyq kómek kórsetýge arnalǵan. Dárigerlerge arnalǵan jaıly vagondar poıyzdardyń jolda jylyna 300 kún bolýyna oraı jabdyqtalǵan» dedi ol.
Quramdardyń júrý baǵyty men dárigerler brıgadasy kórsetetin qyzmetteri týraly «Samruk-Kazyna Trust» áleýmettik jobalardy damytý qorynyń Basqarýshy dırektory Lıma Dıas, «Apattyq medısına temir jol gospıtali» AQ basqarma tóraǵasy Ǵabylnur Ábdilmanov baıandady.
Raýan Qaıdar,
«Egemen Qazaqstan»
