Halyqty jumyspen qamtý men otandyq qurylys materıaldaryn óndirýshilerdi yntalandyrý maqsatynda atalǵan baǵdarlama aıasynda sońǵy eki jyl ishinde avtojol jobalaryn oryndaýǵa 616 mlrd teńge bólinipti. Onyń 329 mlrd teńgesi Ulttyq qor esebinen qaralǵan. Al mınıstr keltirgen derekterge súıensek, bólingen qarajat búginde tolyq ıgerilgen.
«Naqtylaı túsetin bolsaq, bul qarjyǵa respýblıka aýmaǵy boıynsha 9 joba iske asyryldy: «Batys Eýropa – Batys Qytaı», «Ortalyq – Ońtústik», «Ortalyq – Shyǵys», «Beıneý – Aqtaý», «Almaty – О́skemen», «Astana –Petropavl», «Jezqazǵan – Petropavl», «Aqtóbe – Atyraý» jáne «Oral – Kamenka» joldarynda jumys qyzý júrip, jol qurylysymen Qazaqstannyń 12 aımaǵyndaǵy 2 myń shaqyrym qamtyldy. Jobalarǵa elimizdiń 75 myń adamy qatystyrylyp, materıaldardyń 90%-yn otandyq óndirýshiler daıyndady. Osy atalǵan sharýalardyń barlyǵy «100 naqty qadam» Ult josparynyń 92-qadamy sheńberinde júzege asyryldy», – dedi J.Qasymbek.
Qazirgi ýaqytta mınıstrlik pen oblystyq ákimdikter birlese otyryp, respýblıkalyq mańyzy bar avtojoldarda jol qyzmetiniń obektilerin jańartý jóninde jumystar júrgizýde eken. Munyń syrtynda, «Nurly jol» aıasynda 2020 jylǵa deıin negizgi halyqaralyq dálizderde Ulttyq standartqa saı keletin 260 qyzmet nysandaryn damytý kózdelýde. Sonymen qatar, baǵdarlama aıasynda iske asyrylyp jatqan mańyzy joǵary jobalardyń biri – Astanadaǵy jańa temir jol vokzalynyń qurylysy boldy. Búginde qurylys nysanynyń árleý jumystary aıaqtalyp keledi.
«Jańa vokzal mamyr aıynda paıdalanýǵa beriledi dep josparlanýda. Jalpy alǵanda, jańa vokzaldyń ótkizý qabileti táýligine 35 myń jolaýshyny quraıdy. Al qoldanystaǵy vokzalmen qosa alǵanda, táýliktik kórsetkish 48,8 myń jolaýshyny quraıtyn bolady. Bul astanalyq jolaýshylar aǵynyna, onyń ishinde, halyqaralyq kórmeni ótkizý kezinde de, sapaly qyzmet kórsetýdi tolyǵymen qamtamasyz etýge múmkindik beredi», – degen mınıstr osydan 2 jyl buryn Astana qalasynyń jańa termınalyn salý jáne áýejaıdyń ushý-qoný jolaǵyn rekonstrýksııalaý jobasy bastalǵanyna da toqtalyp ótti.
«Joba boıynsha jańa jolaýshylar termınalynyń, turaq oryndarynyń qurylysy, ınjenerlik ınfraqurylym, perrondy rekonstrýksııalaý jáne aýmaqty abattandyrý kózdelgen. Qurylys jumystaryn bıylǵy jylǵy 15 mamyrda aıaqtaý mejelengen. Qoryta kele, bul baǵdarlamanyń qosymsha jumys oryndaryn ashýǵa, qurylys materıaldary, týrızm, óńdeýshi ónerkásip sekildi enshiles salalardy damytýǵa múmkindik beretin qýaty bar ekendigin atap ótýimiz kerek», – dedi J.Qasymbek.
Otyrysta qosymsha baıandama jasaǵan Májilistiń Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov ınfraqurylymdy damytýdyń «Nurly jol» baǵdarlamasy aıasyndaǵy jeti baǵytyn iske asyrý úshin 2015-2019 jyldarǵa 5 trln 300 mlrd teńge bólý kózdelgenin alǵa tartyp, onyń ishinde tek avtomobıl magıstraldaryn damytýǵa 2 trln 400 mlrd teńge jumsalatynyn alǵa tartty.
«Eger jańa jobalarǵa baılanysty bul qarajat kóbeıetindigin esepke alsaq, tıimdi kólik-logıstıkalyq ınfraqurylym qurý baǵdarlamanyń mańyzdy baǵyttarynyń biri ekenine kóz jete túsedi», – dedi N.Sabılıanov.
Sondaı-aq, depýtat óz baıandamasynda Elbasy Joldaýynda aıtylǵan tapsyrmalardy júzege asyrý barysynda keıbir jekelegen máseleler bar ekendigin de kóldeneń tartty. «Nurly jol» memlekettik baǵdarlamasynda uzyndyǵy 7 myń shaqyrymnan asatyn 11 avtojol salý kózdelgen bolsa, mańyzdy kólik joldaryn salý kezinde jobalyq sheshimderge salǵyrt qaraý saldarynan jol qaýipsizdigine nuqsan kelýde. Mysaly, buqaralyq aqparat quraldarynda «Qapshaǵaı – Balpyq bı» avtojolynyń aıaqtalǵan ýchaskesinde Muqyr ózeni arqyly ótetin jańa kópirdiń tusynda Alǵabas aýylynyń mańynda joldyń oıylyp ketkeni týraly aqparat boldy. Budan basqa, aıaqtalǵan bir ǵana «Batys Eýropa – Batys Qytaı» kólik-tranzıt dálizi jobasy paıdalanýdyń alǵashqy jylynyń ózinde-aq sý aǵynyna tótep bere almaı otyr. Jýyrda Jambyl oblysynda sý basý qaýpi saldarynan 11 shaqyrym jol ýaqytsha jabyldy. «Ortalyq – Shyǵys», «Astana – О́skemen» mańyzdy baǵyttardyń birinde merdigerlermen bolyp jatqan daýlardyń saldarynan konkýrstyq rásimder uzaqqa sozylýda. Osyndaı jaǵdaılarǵa baılanysty mınıstrlik pen quqyq qorǵaý organdary jurtshylyqty, táýelsiz sarapshylardy tarta otyryp, paıdalanýǵa beriletin avtomobıl joldarynyń sapasy boıynsha aýdıt pen revızııa júrgizýi qajettigi týyndaýda», – dedi depýtat.
О́z kezeginde Jeńis Qasymbek aıtylǵan syn, eskertpelerdiń barlyǵy oryndy ekendigin atap ótip, olqylyqtardy qalpyna keltirýde birlese eńbek etýge shaqyrdy.
Osydan keıin jalǵasyn tapqan taqyrypty talqylaý barysynda tıisti organdardyń ókilderi halyq qalaýlylarynyń saýaldaryna jaýap berdi. Al jaryssózde «Kazlogistik» Qazaqstannyń kólik odaǵynyń bas dırektory Qanat Álmaǵanbetov pen «BI Group Construction» aksıonerlik qoǵamynyń basqarma tóraǵasy Arman Jákenov sóz aldy. Sondaı-aq, Úkimet saǵaty sheńberinde Májilistiń jalpy otyrys zalynyń foıesinde kórme uıymdastyrylǵanyn da aıta keteıik.
Nurlybek Dosybaı,
«Egemen Qazaqstan»
