«Smart Start» jobasyn iske qosý jáne joba tálimgerlerimen tanysý saltanaty «Zerde» Ulttyq ınfokommýnıkasııalyq holdınginde ótti. Memlekettik organdardaǵy sáýlet blogy men jobalyq ofıs qyzmeti týraly baıandaǵan holdıngtiń basqarýshy dırektory Dınara Sheglova óz tájirıbesimen bólisti.
Almaty, Qaraǵandy, Aqtóbe, Astana, Semeı qalalarynda ınfokommýnıkasııalyq tehnologııalar mamandyǵynda oqyp jatqan stýdentter men bitirýshiler jobaǵa qatysý úshin arnaıy irikteýden ótken. Tájirıbeden ótýge kelgenderdiń biri – ál-Farabı atyndaǵy Qazaq ulttyq ýnıversıtetiniń aqparattyq júıeler magıstri Jaqsylyq Dúısenbekuly. Ol jobaǵa qatysý úshin ınfokommýnıkasııalyq tehnologııalardy damytý taqyrybynda esse jazǵanyn aıtady.
"Qazir tutyný zattaryna ınternet arqyly tapsyrys berý, áleýmettik, medısınalyq qyzmetterdi onlaın arqyly atqarýda ınfokommýnıkasııalyq tehnologııanyń mańyzy óte joǵary. Ulttyq kompanııalarda tájirıbeden ótý arqyly jobalyq ofıs qyzmeti týraly kóp nársemen tanysýǵa bolady", deıdi ol.
Atalǵan jobaǵa irikteý bıyl naýryz aıynda bastalǵan. «Zerde» Ulttyq ınfokommýnıkasııalyq holdıngi» basqarma tóraǵasynyń orynbasary Jarqynbek Azamatovtyń aıtýynsha, óndiristik tájirıbeden ótýge yntaly stýdentterdiń jas ereksheligine shekteý qoıylǵan joq. Bolashaqta joba jalǵasýy múmkin.
«Ázirge 10 stýdentti ǵana tańdap aldyq. Jobany jalǵastyrý nemese toqtatý isin aldaǵy ýaqytta nátıjege qaraı oılastyratyn bolamyz. Qazir jumys berýshiler stýdentterden tájirıbe talap etedi. Oqýdy endi bitirgen stýdentte tájirıbe qaıdan bolsyn? Osy olqylyqtyń ornyn toltyrý maqsatynda osyndaı bir jobany qolǵa aldyq», deıdi basqarma tóraǵasynyń orynbasary.
Aıa О́MIRTAI,
«Egemen Qazaqstan»
