Endi sáýirdiń alǵashqy aptasynan bastap jańa juldyzdaryn tabýǵa asyqqan XII respýblıkalyq «Juldyzaı-2017» festıvali jańa qadamǵa baryp otyr.
Birinshiden, bıyl alǵash ret Almaty qalasynyń bas sahnasy – Respýblıka saraıynda festıvaldiń fınaly men gala-konserti ótedi. О́ıtkeni, bıyl qala ákimdigi jobanyń bas seriktesi boldy. Buǵan deıin dástúrli festıval elordamyz Astanada ótip kelgen-di. Jáne birinshi ret festıval jekemenshik-memlekettik formatta uıymdastyrylmaq.
Oǵan qosa, qazylar alqasy ústimizdegi jyldyń 4 sáýirinen bastap jer jerlerde irikteý týrlaryn ótkizý úshin elimizdiń 16 qalasyn aralap shyǵady. Bular – Astana, Almaty, Taldyqorǵan, Shymkent, Taraz, Qyzylorda, Atyraý, Aqtaý, Aqtóbe, Oral, О́skemen, Pavlodar, Kókshetaý, Petropavl, Qostanaı, Qaraǵandy qalalary.
Osy jylǵy jobanyń taǵy bir ereksheligi – erekshe balalarǵa arnalǵan I respýblıkalyq spartakıada festıvalmen qatar bastalady. Mını-fýtbol, ústel tennısi, jeńil atletıka jáne asyq atý syndy sport túrleriniń jeńimpazdary Almaty qalasynda ótetin jarysqa keledi. Sonymen, 2017 jyldyń 26 mamyry men 1 maýsymy aralyǵyna belgilengen spartakıada men gala-konsertke 10-18 jas aralyǵyndaǵy 700-ge jýyq bala qatysady dep kútilýde.
Jýrnalıstermen ótken baspasóz máslıhaty kezinde bıyl jas daryndardy irikteý vokal, ymdaý, aspaptyq oryndaý, horeografııa, beıneleý jáne sándik-qoldanbaly óner túrleri boıynsha ótetindigi málim boldy. Árıne, bul synnan ótken balalardy kelesi kezekte Almatynyń bas sahnasynda óner kórsetý, sheberlik dáristeri, ekskýrsııalar, kórmeler, tanymal ónerpazdarmen kezdesý jáne tamasha merekelik kóńil-kúı kútip tur.
Biz joǵaryda bıyl birinshi ret «Juldyzaı» festıvali jekemenshik-memlekettik turǵyda ótkeli otyrǵanyn aıttyq. Iаǵnı, festıvaldiń gala-konserti men júlde qoryn jáne brendtelgen kıimdermen qamtamasyz etýdi BI Group kompanııasy taǵy da moınyna aldy. Onyń ústine bıyl jeńimpazdarǵa beriletin júlde qory eki esege kóbeıtilip, 30 mıllıon teńgege jetip otyr.
– «Juldyzaı» festıvali − erekshe talap-muqtajdyqtary bar balalar úshin asa mańyzdy shara. Erekshe týǵan talanttar shyǵarmashylyq qabiletin, sporttyq mashyǵyn damyta alady. Almatynyń kórikti jerlerin óz kózderimen kóredi. О́zderindeı balalarmen aralasyp, dos tabady. Tanymal óner adamdarymen dıdarlasady. Bıyl biz de osy festıvalǵa qoldaý kórsetýge sheshim qabyldadyq. Jáne múmkindigi shekteýli balalar arasynda ótetin spartakıadaǵa ulttyq sport túrin qostyq. Festıval balalarǵa unaý úshin barymyzdy salyp jatyrmyz, – deıdi Almaty qalasy deneshynyqtyrý jáne sport basqarmasynyń basshysy Ábil Donbaev.
BI Group kompanııasynyń «MJK-Almaty» dıvızıonynyń bas dırektory Aıdos Muqataev «BI-Juldyzaı» qoryna kompanııanyń qyzmetkerleri 11 jyldan beri erikti túrde qarajat aýdaryp otyrǵanyn aıtady. Atalmysh kompanııanyń qyzmetkerleri qazir Qazaqstan men TMD elderindegi 85 qurylys nysanynda jumys istep jatyr. Osy arada qanatsyz qustaı kishkentaı daryndardyń sahnaǵa shyǵyp, oǵan qosa sal aýrýyna ushyraǵan (DSP) balalardyń emine osy kompanııanyń jumysshylary septesip kele jatqanyn aıtý lázim. Atalmysh kompanııa bıyl alǵash ret Almaty qalasy ákimdigimen birigip, festıvaldi aýqymdy deńgeıge kótere alǵandary úshin qýanyshty.
– Osy festıvaldi uıymdastyryp júrgenimizge on jyldan asty. Bizdiń jobaǵa qatysqan balalardyń kópshiligi ómirden jolyn taýyp ketkenine qýanamyz. Biraq bizdiń kózdegenimiz – daryndy balalardy tanytyp qana qoımaı, ózine degen senimdi oıatý. Osy festıvaldiń arqasynda kózge túsken talaı talantty jetkinshek joǵary oqý oryndaryna tústi. Olar ózderinde jiger men qabilet bar ekenderine kózderi jetti. Eń bastysy, «Juldyzaı» festıvaline qatysqysy keletin ul-qyzdardyń sany jyl saıyn kóbeıip keledi. Múmkindigi shekteýli balalardyń ómirge degen qulshynysyn oıatýǵa qol jetkize alǵanymyz úshin qýanamyz, – deıdi «BI-Juldyzaı» festıvali dırektorynyń orynbasary Altynaı Táńirbergenova.
Sonymen, «Juldyzaı» respýblıkalyq festıvali dástúr boıynsha 1 maýsymda – Halyqaralyq balalardy qorǵaý kúninde úlken konsertpen aıaqtalmaq. Osy jyly festıvaldiń basty alańy – Almaty qalasyndaǵy Respýblıka saraıy bolady.
Osy arada «Juldyzaı» festıvali Bilim jáne ǵylym mınıstrligi, oblystyq bilim berý basqarmalarynyń qoldaýymen 2005 jyldan beri úzdiksiz ótip kele jatqanyn aıtýǵa bolady.
Festıvaldiń 11 jyldyq tarıhynda oǵan Qazaqstannyń túkpir-túkpirinen 36 myńnan astam bala qatysqan. 7 myńǵa jýyq bala elordamyzdyń eń tanymal sahnalarynda óner kórsetti. Olardyń kópshiligi osy jobany iske asyrý nátıjesinde elimizdiń shyǵarmashylyq joǵary oqý oryndaryna qabyldanǵan.
Aınash ESALI,
«Egemen Qazaqstan»
ALMATY
